Rahul Gandhi: అమేఠీ బరిలో రాహుల్‌.. స్పష్టతనిచ్చిన కాంగ్రెస్‌ నేత!

ఇంటర్నెట్‌డెస్క్‌: కాంగ్రెస్‌ అగ్ర నేత రాహుల్‌ గాంధీ (Rahul Gandhi) 2024 పార్లమెంట్‌ ఎన్నికల్లో కూడా అమేఠీ నుంచి బరిలోకి దిగనున్నారు. ఈ విషయాన్ని ఆ జిల్లా కాంగ్రెస్‌ అధ్యక్షుడు ప్రదీప్‌ సింఘాల్‌ చెప్పారు. ఆయన దిల్లీ పర్యటన ముగించుకొని వచ్చిన తర్వాతే ఈ విషయాన్ని వెల్లడించడం గమనార్హం. త్వరలోనే అధికారిక ప్రకటన ఉంటుందని పేర్కొన్నారు. 

అమేఠీ కాంగ్రెస్‌కు కంచుకోట. 1967లో ఈ స్థానం ఏర్పాటు చేసిన నాటి నుంచి వరుసగా 2019 వరకూ ఆ పార్టీకి చెందిన అభ్యర్థులే విజయం సాధించారు. ఇక్కడి నుంచి సంజయ్‌ గాంధీ రెండు సార్లు, రాజీవ్‌ గాంధీ మూడు సార్లు, సోనియా గాంధీ ఒకసారి బరిలో నిలిచి పార్లమెంట్‌లో అడుగుపెట్టారు. రాహుల్‌ 2002 నుంచి ఆ పార్లమెంట్‌ స్థానంలో పోటీ చేస్తున్నారు. 2019 మినహా మిగిలిన అన్ని సార్లు ఆయనే గెలిచారు. గత ఎన్నికల్లో మాత్రం భాజపా అభ్యర్థి స్మృతి ఇరానీ చేతిలో ఓటమి పాలయ్యారు. దీంతో తొలిసారి ఈ స్థానం కాంగ్రెస్‌ చేజారినట్లైంది. 

ఈ సారి కూడా భాజపా తరపున స్మృతి బరిలో నిలిచారు. ఇటీవల కమలం పార్టీ ప్రకటించిన 195 మంది అభ్యర్థుల జాబితాలో ఆమె స్థానం సంపాదించారు. దీంతో ఈ సారి కూడా బలమైన పోటీ జరిగే అవకాశాలున్నాయి. 2014లో ఆమె రాహుల్‌ చేతిలో ఓటమి పాలైన విషయం తెలిసిందే.