Telangana News: పాలేరులో ఎర్రజెండా ఎగరడం ఖాయం : తమ్మినేని వీరభద్రం

ఖమ్మం గ్రామీణం: రాబోయే ఎన్నికల్లో పాలేరు నియోజకవర్గంలో ఎర్రజెండా ఎగరడం ఖాయమని, అందుకు అనుకూలంగా పార్టీ శ్రేణులు కృషి చేయాలని సీపీఎం రాష్ట్ర కార్యదర్శి తమ్మినేని వీరభద్రం అన్నారు. ఖమ్మం గ్రామీణ మండలం ముత్తగూడెంలో ఆదివారం నిర్వహించిన అమరవీరుల సంస్మరణ సభలో తమ్మినేని మాట్లాడారు. రాష్ట్రంలోకి భాజపాను రాకుండా నిలువరించేందుకు కమ్యూనిస్టుల అవసరం ఎంతో ఉందని, అది మునుగోడు ఉప ఎన్నికల రూపంలో రుజువైందన్నారు. తెలంగాణలో త్వరలో జరగనున్న అసెంబ్లీ ఎన్నికల్లో తెరాసతోపాటు సీపీఎం, సీపీఐ పార్టీలు కలిసి పని చేస్తాయన్నారు. ఖమ్మం, నల్గొండ జిల్లాల్లో అన్ని అసెంబ్లీ స్థానాలను కైవసం చేసుకుంటామని ఆయన ధీమా వ్యక్తం చేశారు. గ్రామాల్లో తెరాస, సీపీఐ పార్టీలతో ఏమైనా చిన్న చిన్న మనస్పర్థలు ఉంటే రాబోయే ఎన్నికల నాటికి వాటన్నింటిని సరిచేసుకుని ఎన్నికలకు సిద్ధం కావాలని పార్టీ శ్రేణులకు పిలుపునిచ్చారు. ఈ కార్యక్రమంలో పార్టీ జిల్లా నాయకుడు బండి రమేష్‌, మండల కార్యదర్శి నండ్రప్రసాద్‌, స్థానిక నాయకులు తాటి వెంకటేశ్వర్లు తదితరులు పాల్గొన్నారు.