TDP: ‘ఏపీ హేట్స్‌ జగన్‌’.. పుస్తకాన్ని విడుదల చేసిన తెదేపా

అమరావతి: నవరత్నాల పేరుతో నవమోసాలు చేస్తున్న జగన్‌రెడ్డికి ప్రజాకోర్టులో శిక్ష తప్పదని తెదేపా హెచ్చరించింది. మంగళగిరిలోని ఆ పార్టీ కేంద్ర కార్యాలయంలో ‘ఏపీ హేట్స్‌ జగన్‌’ పుస్తకాన్ని తెదేపా రాష్ట్ర అధ్యక్షుడు అచ్చెన్నాయుడు, ఇతర నేతలు విడుదల చేశారు. ఈ సందర్భంగా నేతలు మీడియాతో మాట్లాడారు. 

52 నెలల వైకాపా పాలనలో ఒక్కో కుటుంబంపై జగన్‌ లక్షలాది రూపాయల భారం మోపారని ఆరోపించారు. విద్యుత్ ఛార్జీల భారమే రూ.64 వేల కోట్లని మండిపడ్డారు. నాసిరకం మద్యంతో  35 లక్షల మందిని రోగాల బారిన పడేలా చేశారని..30 వేల మంది ప్రాణాలు కోల్పోయారని ఆరోపించారు. మద్యం ద్వారా వచ్చిన ఆదాయంలో తాడేపల్లి ప్యాలెస్‌ లక్ష కోట్ల కమీషన్‌ కొట్టేసిందని దుయ్యబట్టారు. తన దోపిడీని ఎదుటివారికి అంటగట్టి.. చెప్పిన అబద్ధమే వందసార్లు చెప్పడం జగన్ రెడ్డి నైజమని నేతలు ఆగ్రహం వ్యక్తం చేశారు. మేనిఫెస్టోలోని హామీలన్నీ నెరవేర్చానని చెప్పుకోవడానికి సిగ్గుండాలన్నారు. జగన్ నెరవేర్చని హామీల లిస్టు చాన్తాడంత ఉందని.. ఎప్పుడెప్పుడు వదిలించుకుందామా అని ఉద్యోగులు, నిరుద్యోగులు ఎదురు చూస్తున్నారని తెలిపారు.