Kishan Reddy: తెలంగాణలో డబుల్‌ డిజిట్‌లో ఎంపీ సీట్లు గెలుచుకుంటాం: కిషన్‌ రెడ్డి

హైదరాబాద్‌: లోక్‌సభ ఎన్నికల్లో తెలంగాణలో భాజపా డబుల్‌ డిజిట్‌లో సీట్లను గెలుచుకుంటుందని ఆ పార్టీ రాష్ట్ర అధ్యక్షుడు, కేంద్రమంత్రి కిషన్‌ రెడ్డి (Kishan Reddy) ధీమా వ్యక్తం చేశారు. శాసనసభ ఎన్నికల్లో ఆశించిన సీట్లు సాధించకపోయినా అద్భుతమైన విజయాలను భాజపా సొంతం చేసుకుందన్నారు. మోదీని మూడోసారి గెలిపించేందుకు దేశ ప్రజలతో పాటు తెలంగాణ ప్రజానీకం పార్లమెంట్‌ ఎన్నికల కోసం ఎదురుచూస్తోందన్నారు. లోక్‌సభ ఎన్నికలకు శ్రేణులను సంసిద్ధం చేసేందుకు డిసెంబరు 28న రంగారెడ్డి జిల్లా కొంగర సమీపంలో విస్త్రృతస్థాయి సమావేశం నిర్వహిస్తున్నట్లు కిషన్‌ తెలిపారు. రానున్న ఎన్నికలకు 90 రోజుల కార్యాచరణ సిద్ధం చేసినట్లు ఆయన చెప్పారు. ఈ సమావేశానికి అమిత్‌షా హాజరవుతున్నట్లు కిషన్‌ రెడ్డి వెల్లడించారు.