మిక్స్‌డ్‌లో భారత్‌కు రజతం, కాంస్యం

ప్రపంచకప్‌ షూటింగ్‌

భోపాల్‌: ప్రపంచకప్‌ షూటింగ్‌లో భారత్‌ ఖాతాలో రెండు పతకాలు చేరాయి. మిక్స్‌డ్‌ ఎయిర్‌పిస్టల్‌ టీమ్‌ పెయిర్‌ విభాగంలో వరుణ్‌ తోమర్‌-రిథమ్‌ సాంగ్వాన్‌ రజతం గెలవగా.. ఎయిర్‌రైఫిల్‌ మిక్స్‌డ్‌ టీమ్‌ ఈవెంట్లో రుద్రాంక్ష్ పాటిల్‌-నర్మద నితిన్‌ కాంస్యం సొంతం చేసుకున్నారు. పిస్టల్‌ ఫైనల్లో వరుణ్‌-రిథమ్‌ 11-17తో క్విన్‌ వీయ్‌-లూ జిన్‌యావో (చైనా) చేతిలో ఓడి రజతం సాధించారు. ఆరంభంలో 7-15తో వెనుకబడ్డ భారత జంట.. ఆ తర్వాత పుంజుకుని 11-15తో ప్రత్యర్థిని సమీపించింది. కానీ చైనా ద్వయం వరుసగా రెండు పాయింట్లు నెగ్గి భారత్‌ జోడీ పోరాటానికి తెరదించింది. అంతకుముందు క్వాలిఫికేషన్లో క్విన్‌-జిన్‌యావో (586), వరుణ్‌-రిథమ్‌ (581) తొలి రెండు స్థానాల్లో నిలిచి ఫైనల్‌ చేరారు. ఇదే విభాగంలో పోటీపడిన దివ్య-శరభ్‌జ్యోత్‌ సింగ్‌ (574, 5వ స్థానం) కాంస్య పతక పోరుకు పాయింట్‌ దూరంలో ఆగిపోయారు. వెన్నికాంప్‌-జోసెఫ్‌ (జర్మనీ, 575) నాలుగో స్థానం సాధించి భారత జంటను వెనక్కి నెట్టారు. ఎయిర్‌రైఫిల్‌ కాంస్య పతక పోరులో రుద్రాంక్ష్-నర్మద 16-8తో జాంగ్‌-హోనాన్‌ (చైనా)ను ఓడించారు. అంతకుముందు క్వాలిఫికేషన్‌లో భారత జోడీ (632 పాయింట్లు) మూడో స్థానంలో నిలిచింది.