హేజిల్‌వుడ్‌ సిద్ధం

మెల్‌బోర్న్‌: భారత్‌తో ప్రపంచ టెస్టు ఛాంపియన్‌షిప్‌ (డబ్ల్యూటీసీ) ఫైనల్‌కు ఆస్ట్రేలియా స్టార్‌ పేసర్‌ జోష్‌ హేజిల్‌వుడ్‌ సిద్ధమయ్యాడు. అతడు ఫిట్‌నెస్‌ సాధించినట్లు.. ప్రాక్టీస్‌ మొదలెట్టినట్టు క్రికెట్‌ ఆస్ట్రేలియా (సీఏ) ప్రకటించింది. ‘‘తాజాగా ఐపీఎల్‌లో అయిన గాయం నుంచి పేసర్‌ హేజిల్‌వుడ్‌ కోలుకున్నాడు. అతడు బౌలింగ్‌ ప్రాక్టీస్‌ మొదలుపెట్టాడు. త్వరలో జరగబోయే డబ్ల్యూటీసీ ఫైనల్‌తో పాటు యాషెస్‌ సిరీస్‌ కోసం జోష్‌ ప్రాక్టీస్‌లో మరింత తీవ్రత పెంచనున్నాడు’’ అని సీఏ వెల్లడించింది. ఐపీఎల్‌లో రాయల్‌ ఛాలెంజర్స్‌ బెంగళూరు తరఫున కేవలం మూడు మ్యాచ్‌లు ఆడి 9 ఓవర్లే వేసిన హేజిల్‌వుడ్‌.. గుజరాత్‌తో మ్యాచ్‌లో గాయపడ్డాడు. ఆ తర్వాత అతడు స్వదేశానికి వెళ్లిపోవడంతో డబ్ల్యూటీసీ ఫైనల్‌కు కూడా అందుబాటులో ఉండడనే అనుమానాలు తలెత్తాయి. కానీ అతడికి అయిన గాయం పెద్దది కాదని పరీక్షల్లో తేలింది.