Jasprit Bumrah: బుమ్రా ‘మౌనం’ ఎందుకు?

ముంబయి: బుమ్రా ఇన్‌స్టాగ్రామ్‌ పోస్ట్‌ కలకలం రేపింది. అతడు ముంబయి ఇండియన్స్‌ను వీడనున్నాడనే ఊహాగానాలు చెలరేగాయి. ‘‘కొన్నిసార్లు మౌనంగా  ఉండడమే సరైన జవాబు’’ అంటూ తన ఇన్‌స్టాగ్రామ్‌ స్టోరీలో బుమ్రా పెట్టిన పోస్ట్‌తో సోషల్‌ మీడియాలో పెద్ద ఎత్తున చర్చమొదలైంది. ముంబయి ఇండియన్స్‌ను అతడు అన్‌ఫాలో అయినట్లు చూపే స్క్రీన్‌షాట్లను కొందరు అభిమానులు పంచుకోగా.. అతడు ఆర్సీబీకి వెళ్లిపోయే అవకాశముందని కొందరు అభిప్రాయపడ్డారు. రోహిత్‌ శర్మ దిగిపోయాక కెప్టెన్‌ కావాలనుకున్న బుమ్రా.. తిరిగొచ్చిన హార్దిక్‌ పాండ్య తనకు అడ్డుగా మారతాడని భావిస్తున్నాడని ఇంకొందరు వ్యాఖ్యానించారు. బుమ్రా సాధారణంగా సోషల్‌ మీడియాలో చురుకుగా ఉండడు. ఐపీఎల్‌ కెరీర్‌ ఆరంభం (2015) నుంచి బుమ్రా, ముంబయి ఇండియన్స్‌తో ఉన్నాడు.