IND vs BAN: విరాట్ వికెట్‌ అద్భుతం.. నాలుగో రోజు త్వరగా రెండు వికెట్లు తీస్తే చాలు: మెహిదీ

ఇంటర్నెట్ డెస్క్: భారత్-బంగ్లాదేశ్‌ జట్ల మధ్య రెండో టెస్టు మ్యాచ్ రసవత్తరంగా మారింది. ఇప్పటి వరకు జరిగిన మూడు రోజుల ఆటలో అత్యధిక భాగం టీమ్‌ఇండియాదే ఆధిపత్యం  కొనసాగినప్పటికీ.. కీలకమైన లక్ష్య ఛేదనలో బంగ్లా స్పిన్నర్లు భారత టాప్‌ ఆర్డర్‌ నడ్డి విరిచారు. 145 పరుగుల స్వల్ప లక్ష్య ఛేదనలో టీమ్‌ఇండియా మూడో రోజు ఆట ముగిసేసమయానికి నాలుగు వికెట్ల నష్టానికి 45 పరుగులు చేసింది. ఇంకో వంద పరుగులు చేస్తే భారత్‌ విజయం సాధిస్తుంది. 

భారత టాప్‌ ఆర్డర్‌ను కకావికలం చేయడంలో బంగ్లాదేశ్‌ ఆల్‌రౌండర్‌ మెహిదీ హసన్ మిరాజ్‌ కీలక పాత్ర పోషించాడు. మూడు వికెట్లు తీయగా.. అందులో విరాట్ కోహ్లీతోపాటు పుజారా, శుభ్‌మన్ గిల్‌ వికెట్లను తీశాడు. బంగ్లాను పోటీలో నిలిపిన మెహిదీ హసన్ మ్యాచ్‌ ముగిసిన అనంతరం మాట్లాడుతూ.. ‘‘నాలుగో రోజు ఆరంభంలో వికెట్లను పడగొడితే మ్యాచ్‌పై పట్టు సాధించే అవకాశం ఉంది. రేపు తప్పకుండా ఇంకా ఉత్తమంగా బౌలింగ్‌ చేస్తాననే నమ్మకం ఉంది’’ అని తెలిపాడు. 

తమ జట్టు పాజిటివ్‌ దృక్పథంతో ముందుకు సాగుతోందని మెహిదీ చెప్పాడు. ‘‘పిచ్‌పై బంతి చాలా టర్నింగ్‌ అవుతోంది. మేం పాజిటివ్‌ దృక్పథంతో ఆడేందుకు ప్రయత్నించాం. నాలుగో రోజు త్వరగా రెండు వికెట్లు తీస్తే.. తప్పకుండా విజయం సాధిస్తామనే నమ్మకం మాకుంది. ఇక కోహ్లీకి సంధించిన బంతి అద్భుతం. మరింత టర్న్‌ కావడంతో వికెట్‌ దక్కింది’’ అని మెహిదీ వివరించాడు.