‘గుడ్ టచ్ - బ్యాడ్ టచ్’.. ఈజీగా నేర్పించిన ‘గువ్వా గోరింక’!

చిన్నారులపై జరిగే లైంగిక దాడుల్ని అరికట్టడంలో ‘గుడ్‌ టచ్‌ - బ్యాడ్‌ టచ్‌’ కాన్సెప్ట్‌ చక్కగా పనిచేస్తుంది. అయితే దీన్ని సులభంగా అర్థం చేసుకునేలా పిల్లలకు ఎలా నేర్పించాలో, దీనిపై పూర్తి అవగాహన ఎలా కల్పించాలో చాలామందికి అర్థం కాదు. అలాంటి వాళ్ల కోసం ఈటీవీలో ప్రసారమయ్యే ‘గువ్వా గోరింక’ సీరియల్‌ బృందం ఓ చిరు ప్రయత్నం చేసింది. చిన్నారులకు, పెద్దవాళ్లకు ఈ కాన్సెప్ట్‌ సులభంగా అర్థమయ్యేలా ఓ వీడియోను రూపొందించింది. ప్రస్తుతం ఈ వీడియో సోషల్‌ మీడియాలో వైరలవుతోంది.

సామాజిక సమస్యల్ని స్పృశిస్తూ.. చక్కటి సందేశం ఇవ్వడంలో కొన్ని సినిమాలు, సీరియళ్లు ముందుంటాయి. ఇక పలువురు మహిళలు సీరియల్స్‌ని ఎక్కువగా ఫాలో అయ్యే విషయం తెలిసిందే. దీన్ని దృష్టిలో ఉంచుకొనే చిన్నారులకు సంబంధించిన ఓ కీలకమైన అంశంతో ‘గువ్వా గోరింక’ బృందం తాజాగా మన ముందుకొచ్చింది. చిన్నారులపై జరిగే లైంగిక దాడులకు అడ్డుకట్ట వేసేందుకు తమ వంతుగా ఓ చిన్న ప్రయత్నం చేసింది.

ఒక్క సన్నివేశంతో..!

ఇందులో భాగంగానే తాజా ఎపిసోడ్‌లో ఓ సీన్‌ని ప్రత్యేకంగా జత చేశారు. చిన్నారులకు గుడ్‌ టచ్‌-బ్యాడ్‌ టచ్‌ గురించి అవగాహన కల్పించే సీన్‌ అది. అందులో మహిళ ఓ చిన్నారి శరీర భాగాల్ని తాకుతుంటుంది. ముందుగా బుగ్గలు, చెవులు, తల మీద తాకుతుంది.. దీన్ని గుడ్‌ టచ్‌గా సూచిస్తూ.. ఆ చిన్నారి రెండు చేతులతో థమ్సప్‌ సింబల్‌ని చూపిస్తుంది. ఇక మరో ఫ్రేమ్‌లో.. చిన్నారి ఛాతీ, నడుము, నడుము కింది భాగాల్ని తాకే ప్రయత్నం చేస్తుందా మహిళ. దీనికి ఆ చిన్నారి ప్రతిఘటిస్తూ బ్యాడ్‌ టచ్‌గా సంజ్ఞలు చేస్తుంది. ఈ క్రమంలో రివర్స్‌ థమ్సప్‌ సింబల్‌ని చూపిస్తుంది.

ఇలా ఓ చిన్న వీడియో రూపంలో సింపుల్‌గా ఈ కాన్సెప్ట్‌ని అర్థం చేయించే ప్రయత్నం చేసిందీ చిత్ర బృందం. ప్రస్తుతం ఈ వీడియో సోషల్‌ మీడియాలో వైరలవుతోంది. కుటుంబమంతా కలిసి కూర్చొని చూసే సీరియల్స్‌ ద్వారా ఇలాంటి సామాజిక అంశాలపై అవగాహన కల్పించడం మంచి పరిణామం అని చాలామంది అభిప్రాయపడుతున్నారు.

మరి మీరూ ఆ వీడియో చూసేసి ఫ్రెండ్స్‌కి, బంధువులకు షేర్ చేయండి.. గుడ్‌ టచ్‌-బ్యాడ్‌ టచ్‌ గురించి అవగాహన పెంపొందించండి!