UN chief: సన్నిహితుల చేతుల్లోనే.. ప్రతి 11 నిమిషాలకు ఓ మహిళ బలి

ఐరాస: మహిళలపై కొనసాగుతోన్న వివక్ష, హింసపై ఐక్యరాజ్య సమితి (United Nations) ఆందోళన వ్యక్తం చేసింది. ప్రపంచ వ్యాప్తంగా ప్రతి 11నిమిషాలకు ఓ మహిళ/బాలిక తన సన్నిహితులు లేదా సొంత కుటుంబీకుల చేతుల్లోనే దారుణ హత్యకు గురవుతోందని పేర్కొంది. అంతర్జాతీయంగా మానవ హక్కుల ఉల్లంఘనల్లో మహిళలపై హింసే అత్యంత విస్తృతమైందని అభిప్రాయపడింది. ‘మహిళలపై హింస నిర్మూలన దినం’ (నవంబర్‌ 25న) పురస్కరించుకొని ఐక్యరాజ్యసమితి సెక్రటరీ జనరల్‌ ఆంటోనియో గుటెరస్‌ ఈ వ్యాఖ్యలు చేశారు.

‘ప్రపంచ వ్యాప్తంగా మానవ హక్కుల ఉల్లంఘనల్లో మహిళలు, బాలికలపై జరుగుతోన్న హింసే అత్యంత విస్తృతమైంది. ప్రతి 11 నిమిషాలకు ఒక మహిళ/బాలిక తన సన్నిహితులు లేదా సొంత కుటుంబీకుల చేతుల్లోనే బలి అవుతోంది. కరోనా మహమ్మారి మొదలు ఆర్థిక సంక్షోభం వరకు వారిపై భౌతికంగా, మౌఖిక దాడులు మరింత పెరుగుతున్నాయి’ అని ఐక్యరాజ్యసమితి సెక్రటరీ జనరల్‌ ఆంటోనియో గుటెరస్‌ పేర్కొన్నారు. మహిళలు/బాలికలపై ఆన్‌లైన్‌ హింస కూడా ప్రబలంగా ఉందన్న ఆయన.. లైంగిక వేధింపులతోపాటు మహిళల వస్త్రధారణ, ఫొటోల వంటి విషయాల్లో ఎన్నో రకాలుగా దాడులు కొనసాగుతున్నాయన్నారు.

మహిళలపై జరుగుతోన్న హింసను ఇక చరిత్ర పుస్తకాల్లోకి పంపాలన్న ఐరాస చీఫ్‌.. ఇందుకు ప్రపంచ దేశాలు శంఖారావం పూరించాలని పిలుపునిచ్చారు. ప్రభుత్వాలు ఇందుకోసం ప్రణాళికలు రూపొందించి, అమలు చేయాలని సూచించారు. ఈ క్రమంలో మహిళా హక్కుల సంస్థలకు ఎక్కువ మొత్తంలో నిధులు పెంచాలని ఐరాస సెక్రటరీ జనరల్‌ సూచించారు.