ఆస్ట్రేలియాలో చదువుకు బ్యాంకులో రూ.16 లక్షలు ఉండాల్సిందే

రేపటి నుంచి అమల్లోకి కొత్త నిబంధన

ఇంటర్నెట్‌ డెస్క్‌: వలసలను కట్టడి చేసేందుకు ప్రయత్నాలు చేస్తోన్న ఆస్ట్రేలియా.. ఉన్నత చదువుల కోసం వచ్చే విదేశీ విద్యార్థులకు సంబంధించి కీలక నిర్ణయం తీసుకుంది. వీసా కోసం దరఖాస్తు చేసుకునే విదేశీ విద్యార్థుల కనీస బ్యాంకు నిల్వ మొత్తాన్ని 29,710 ఆస్ట్రేలియన్‌ డాలర్లకు పెంచుతున్నట్లు ప్రకటించింది. ఈ మొత్తం సుమారు రూ.16,35,000కు సమానం. కొత్త నిబంధన ఈ నెల 10 నుంచి అమల్లోకి రానుంది. ఉన్నత విద్య నిమిత్తం ఆస్ట్రేలియా వెళ్లే విద్యార్థులు.. అక్కడ ఏడాది నివాసానికి అయ్యే ఖర్చుల మొత్తాన్ని తమ ఖాతాలో ఉన్నట్లు చూపెట్టాల్సి ఉంటుంది. ఈ వీసా డిపాజిట్‌ కనీస పరిమితి గతంలో 21,041 ఆస్ట్రేలియన్‌ డాలర్లుగా ఉండేది. గతేడాది అక్టోబరులో దానిని 24,505 ఆస్ట్రేలియన్‌ డాలర్లకు పెంచగా.. తాజాగా 29,710 ఆస్ట్రేలియన్‌ డాలర్లకు పెంచుతూ ప్రభుత్వం నిర్ణయం తీసుకుంది.