France Airports: ఒకేసారి 6 ఎయిర్‌పోర్టులకు బాంబు బెదిరింపు.. ఫ్రాన్స్‌లో కలకలం

పారిస్‌: ఫ్రాన్స్‌లో ఒకేసారి పలు విమానాశ్రయాలకు (France Airports) బెదిరింపులు రావడం తీవ్ర కలకలం రేపింది. దీంతో ఆయా ఎయిర్‌పోర్టులను ఖాళీ చేయించిన అధికారులు ముమ్మర తనిఖీలు చేపట్టినట్లు పలు అంతర్జాతీయ మీడియా కథనాలు వెల్లడించాయి. ఇజ్రాయెల్‌ - హమాస్‌ మధ్య యుద్ధం కొనసాగుతున్న వేళ.. ఈ బెదిరింపులు రావడం గమనార్హం.

ఫ్రాన్స్‌లో లిల్లె ఎయిర్‌పోర్టుకు తొలుత బాంబు బెదిరింపు (Bomb Threat) మెయిల్‌ వచ్చింది. దీంతో భద్రతా సిబ్బంది విమానాశ్రయాన్ని ఖాళీ చేయించి తనిఖీలు చేపట్టారు. ఆ తర్వాత గంటల వ్యవధిలోనే బ్యూవైస్‌, టోలౌస్‌, నైస్‌, లియాన్‌, నాంటెస్‌ ఎయిర్‌పోర్టులకు కూడా ఈ తరహా బెదిరింపులు రావడంతో అధికారులు అప్రమత్తమయ్యారు. ముందు జాగ్రత్తగా ఆ విమానాశ్రయాలను ఖాళీ చేయించారు. ఏం జరుగుతుందో అర్థం గాక.. ప్రయాణికులు తీవ్ర భయాందోళనకు గురయ్యారు.

వారి రాకెట్‌ గురితప్పే పేలుడు.. అల్‌ అహ్లి ఆసుపత్రి ఘటనపై ఐడీఎఫ్‌ ప్రతినిధి..!

కాగా.. నైస్‌ ఎయిర్‌పోర్టులో ఓ అనుమానాస్పద బ్యాగు కూడా కన్పించినట్లు ఆ విమానాశ్రయం తమ ఎక్స్‌ (ట్విటర్‌) ఖాతాలో వెల్లడించింది. అయితే ప్రస్తుతం పరిస్థితులు సాధారణ స్థితికి వచ్చినట్లు పేర్కొంది. మరోవైపు, లిల్లె ఎయిర్‌పోర్టులోనూ ఎలాంటి పేలుడు పదార్థాలు లభించకపోవడంతో అధికారులు ఊపిరి పీల్చుకున్నారు. ప్రస్తుతం కొన్ని చోట్ల తనిఖీలు కొనసాగుతున్నాయి.

కాగా.. ఇజ్రాయెల్‌-హమాస్‌ పోరు (Israel Hamas Conflict) తర్వాత నుంచి ఫ్రాన్స్‌లో ఉద్రిక్తత ఘటనలు చోటుచేసుకుంటున్నాయి. ఇటీవల ఓ స్కూల్‌లోకి దుండగుడు చొరబడి ఓ టీచర్‌ను అతి దారుణంగా పొడిచి చంపిన విషయం తెలిసిందే. దీంతో ఫ్రాన్స్‌ వ్యాప్తంగా భద్రతను కట్టుదిట్టం చేశారు. ప్రముఖ పర్యాటక ప్రాంతాల్లో భద్రతా బలగాలను మోహరించారు.