Rishi Sunak: రిషి సునాక్‌కు మరో సవాల్‌.. సొంత పార్టీ నుంచే తొలి ‘అవిశ్వాసం’

లండన్‌: యూకే (UK) ప్రధానమంత్రి రిషి సునాక్‌ (Rishi Sunak)కు మరో సవాల్‌ ఎదురైంది. సొంత పార్టీ ఎంపీయే ఆయనకు వ్యతిరేకంగా ‘అవిశ్వాస’ లేఖ (no confidence letter)ను సమర్పించారు. సువెల్లా బ్రేవర్మన్‌ను మంత్రి పదవి నుంచి తప్పిస్తూ.. కేబినెట్‌లో మార్పులు చేసిన గంటల వ్యవధిలోనే ఆయనపై ‘అవిశ్వాస’ గళం వినిపించడం ప్రాధాన్యం సంతరించుకుంది.

రిషి సునాక్‌ (Rishi Sunak)కు వ్యతిరేకంగా టోరీ (Tory) ఎంపీ ఆండ్రియా జెన్‌కిన్స్‌ సోమవారం అవిశ్వాస లేఖను ప్రయోగించారు. హౌస్‌ ఆఫ్‌ కామన్స్‌ వ్యవహరాలను చూసే 1922 కమిటీ ఛైర్మన్‌ గ్రాహమ్‌ బ్రాడీకి ఆమె ఈ లేఖను సమర్పించారు. ఈ విషయాన్ని ఆండ్రియా ఎక్స్‌ వేదికగా వెల్లడిస్తూ.. అవిశ్వాస లేఖను పోస్ట్ చేశారు. ‘‘జరిగింది చాలు. నా అవిశ్వాస లేఖను సమర్పించా. రిషి సునాక్‌ను పదవి నుంచి దింపి.. ఆయన స్థానంలో నిజమైన కన్జర్వేటివ్‌ పార్టీ నేతను ఎన్నుకునే సమయం వచ్చింది’’ అని ఆమె తన పోస్ట్‌లో రాసుకొచ్చారు.

మాజీ ప్రధాని బోరిస్‌ జాన్సన్‌కు నమ్మిన వ్యక్తిగా పేరున్న ఆండ్రియా.. కేబినెట్‌ నుంచి సువెల్లా బ్రేవర్మన్‌ను తొలగించడాన్ని తీవ్రంగా వ్యతిరేకించారు. ఈ క్రమంలోనే ఆమె ఈ ‘అవిశ్వాస’ లేఖను సమర్పించారు. రిషి సునాక్‌ తన కేబినెట్‌లో నిజాలు మాట్లాడే ఏకైక వ్యక్తి సువెల్లాపై వేటు వేశారని, దాన్ని తాను తీవ్రంగా ఖండిస్తున్నానని తెలిపారు. రిషి సునాక్‌ దిగిపోవాల్సిన సమయం ఆసన్నమైందని, ఆయనకు వ్యతిరేకంగా అవిశ్వాస లేఖలు సమర్పించాలని తోటి టోరీ ఎంపీలను ఆమె అభ్యర్థించారు.

బ్రిటన్‌ హోం మంత్రి సువెల్లాకు ఉద్వాసన.. విదేశాంగ మంత్రిగా డేవిడ్‌ కామెరూన్‌

రిషి.. అవిశ్వాస పరీక్ష ఎదుర్కోవాల్సిందేనా?

కాగా.. రిషి సునాక్‌ ప్రధాని పదవి చేపట్టిన తర్వాత ఆయనపై అవిశ్వాస లేఖ రావడం ఇదే తొలిసారి. అయితే, దీనిపై ఇప్పుడే ఆయన అవిశ్వాస పరీక్షను ఎదుర్కోవాల్సిన అవసరం లేదని తెలుస్తోంది. పార్టీకి చెందిన మొత్తం ఎంపీల్లో 15శాతం మంది తాము కొత్త నాయకుడిని కోరుకుంటున్నామంటూ లేఖలు పంపితే అప్పుడు కన్జర్వేటివ్‌ పార్టీలో రిషి నాయకత్వంపై విశ్వాస పరీక్ష ఓటింగ్ నిర్వహిస్తారు.

గత కొంతకాలంగా వివాదాల్లో చిక్కుకున్న సువెల్లా బ్రేవర్మన్‌ను మంత్రి పదవి నుంచి తొలగిస్తున్నట్లు రిషి సునాక్‌ ప్రభుత్వం సోమవారం ప్రకటించింది. ఆ పదవిని విదేశాంగ మంత్రి జేమ్స్‌ క్లెవర్లీకి కట్టబెట్టింది. ఇక, మాజీ ప్రధాని డేవిడ్‌ కామెరూన్‌కు కేబినెట్‌లో చోటు కల్పించింది. ఆయనకు విదేశాంగ, కామన్వెల్త్‌, అభివృద్ధి వ్యవహారాల శాఖ’ బాధ్యతలు అప్పగించింది.