Huzurabad By Election: కిషన్‌రెడ్డి ప్రచారంలో ఉద్రిక్తత

ప్రధానాంశాలు

Huzurabad By Election: కిషన్‌రెడ్డి ప్రచారంలో ఉద్రిక్తత

హుజూరాబాద్‌ నియోజకవర్గంలో తెరాస, భాజపా వర్గాల ఘర్షణ

ఈనాడు డిజిటల్‌, కరీంనగర్‌, జమ్మికుంట గ్రామీణం, న్యూస్‌టుడే: హుజూరాబాద్‌ నియోజకవర్గంలో శుక్రవారం సాయంత్రం కేంద్రమంత్రి కిషన్‌రెడ్డి, ఈటల రాజేందర్‌ నిర్వహిస్తున్న ప్రచారంలో తెరాస, భాజపా శ్రేణులు ఘర్షణకు దిగాయి. కరీంనగర్‌ జిల్లా ఇల్లందకుంట మండలం సిరిసేడు గ్రామంలో మంత్రి వాహన శ్రేణికి ముందు తెరాస నాయకులు, కార్యకర్తలు భాజపా అభ్యర్థి ఈటలకు వ్యతిరేకంగా నినాదాలు చేశారు. భాజపా శ్రేణులు కూడా తెరాస వైఖరిని నిరసిస్తూ ప్రతి నినాదాలిచ్చారు. మాటలు మీరుతూ ఉభయవర్గాలు తోసుకున్నాయి. ఎస్సై తిరుపతి సహా సిబ్బంది నిలువరించే ప్రయత్నం చేశారు. సుమారు 15 నిమిషాలపాటు అక్కడ గందరగోళం నెలకొంది. తెరాస కార్యకర్త ఎస్సైను వెనక్కి నెట్టడంతో ఆయన.. అతడిపై చేయి చేసుకున్నారు. కొద్దిసేపటికి ఇరువర్గాలు శాంతించడంతో పరిస్థితి అదుపులోకి వచ్చింది. ఈ గొడవ తర్వాత వాహనంపై నుంచి ఈటల, కిషన్‌రెడ్డి ప్రసంగించారు. కేంద్ర మంత్రి మాట్లాడుతూ.. ‘‘మేము ఎన్నికల నిబంధనల ప్రకారం అనుమతి తీసుకుని ప్రచారం నిర్వహిస్తుండగా, మా పార్టీ నాయకులు, కార్యకర్తలపై తెరాస నాయకులు దాడికి పాల్పడడం సరైన పద్ధతి కాదు. ఇక్కడ తెరాస అరాచకాలకు ఇది నిదర్శనం’’ అని అన్నారు.

కేసు నమోదు: కేంద్రమంత్రి ప్రచారానికి అడ్డుతగిలి గొడవకు కారణమైన పలువురిపై కేసు నమోదు చేసినట్లు ఇల్లందకుంట ఎస్సై తిరుపతి తెలిపారు. తన చొక్కా పట్టుకుని వెనక్కి తోసిన తెరాసకు చెందిన ప్రవీణ్‌తోపాటు ఈ ఆందోళనకు కారణమైన మరికొందరిని వీడియో ఆధారంగా గుర్తించి కేసు నమోదు చేస్తామని తెలిపారు.


ఈసీకి ఫిర్యాదు చేశాం: సంజయ్‌

హుజూరాబాద్‌ పట్టణం, న్యూస్‌టుడే: సిరిసేడులో కిషన్‌రెడ్డి ప్రచారం చేస్తుండగా తెరాస శ్రేణులు దాడులకు పాల్పడటం దుర్మార్గపు చర్య అని భాజపా రాష్ట్ర అధ్యక్షుడు బండి సంజయ్‌ అన్నారు. దీనిపై రాష్ట్ర వ్యాప్తంగా నిరసన కార్యక్రమాలను చేపట్టనున్నట్లు వెల్లడించారు. కేంద్ర ఎన్నికల సంఘానికి ఫిర్యాదు చేశామని చెప్పారు. శుక్రవారం రాత్రి హుజూరాబాద్‌లో ఆయన విలేకరులతో మాట్లాడారు. ముఖ్యమంత్రి కేసీఆర్‌ నేతృత్వంలోనే దాడి జరిగిందని, ఉప ఎన్నిక వాయిదా వేసేందుకే ఇటువంటి వాటికి పాల్పడుతున్నారని ధ్వజమెత్తారు.


భాజపా దాడిని ఖండిస్తున్నాం: పల్లా

జమ్మికుంట గ్రామీణం: సిరిసేడులో తెరాస కార్యకర్తలపై భాజపా కార్యకర్తలు దాడి చేశారని దాన్ని తీవ్రంగా ఖండిస్తున్నామని తెరాస రాష్ట్ర ప్రధాన కార్యదర్శి, ఎమ్మెల్సీ పల్లా రాజేశ్వర్‌రెడ్డి పేర్కొన్నారు. శుక్రవారం రాత్రి ఈ మేరకు ఒక ప్రకటనలో తెలిపారు. ‘‘తెరాస కార్యాలయం ముందు నుంచి ఈటల రాజేందర్‌ ర్యాలీగా వెళ్తూ భాజపా కార్యకర్తలతో కేసీఆర్‌కు వ్యతిరేకంగా రెచ్చగొట్టే నినాదాలు చేయించారు. అయినప్పటికీ తెరాస కార్యకర్తలు సంయమనం పాటించారు. కేంద్రమంత్రి కిషన్‌రెడ్డి, అభ్యర్థి ఈటల రాజేందర్‌ భాజపా కార్యకర్తలను రెచ్చగొట్టి తెరాస శ్రేణులపై దాడి చేయించడమే కాకుండా అక్రమ కేసు బనాయించారు’’ అని ఆరోపించారు.


 

Advertisement


Tags :

ప్రధానాంశాలు

జిల్లా వార్తలు

దేవతార్చన


మరిన్ని