ప్యాంటులో దాచిపెట్టి పాముల అక్రమ రవాణాకు యత్నం

మయామీ విమానాశ్రయంలో చివరి నిమిషంలో భగ్నం చేసిన అధికారులు

మయామీ: ఫ్యాంటులో రహస్యంగా దాచిపెట్టి తరలిస్తున్న రెండు పాములను అమెరికాలోని మయామీ విమానాశ్రయంలో భద్రతా సిబ్బంది చివరి నిమిషంలో గుర్తించారు. ఈ మేరకు ట్రాన్స్‌పోర్ట్‌ సెక్యూరిటీ అడ్మినిస్ట్రేషన్‌ (టీఎస్‌ఏ) ట్విటర్‌లో ఓ పోస్టు ఉంచింది. గత నెల 26న ఓ ప్రయాణికుడిని తనిఖీ చేయగా అతని ఫ్యాంటులో ఉన్న ఓ చిన్నపాటి సంచిలో పాములను గుర్తించినట్లు వెల్లడించింది. చలువ కళ్లద్దాలు దాచుకునే సంచిలా ఉన్న ఓ సంచి, రెండు పాములు టీఎస్‌ఏ షేర్‌ చేసిన ఫొటోలో ఉన్నాయి. ప్రయాణికుడి నుంచి పాములను స్వాధీనం చేసుకున్నామని, అనంతరం వాటిని ఫ్లోరిడా మత్స్య, వన్యప్రాణి సంరక్షణ కమిషన్‌కు అప్పగించామని మయామీ అంతర్జాతీయ విమానాశ్రయ అధికారులు తెలిపారు.