Latest Telugu News | Breaking News Telugu | Telugu News Today | News in Telugu

సంపాదకీయం

Facebook Share Twitter Share Comments Telegram Share
మైక్రోచిప్‌ల కొరతతో సతమతం

లోటు తీర్చేందుకు భారత్‌ తీవ్ర కృషి

కొవిడ్‌ తెచ్చిపెట్టిన అనేక సమస్యల్లో మైక్రోచిప్‌ల (సెమీకండక్టర్ల) కొరత సైతం ఒకటి. కొవిడ్‌ వల్ల ఇంటి నుంచి పని చేసేవారికి కంప్యూటర్లు, స్మార్ట్‌ఫోన్లు, ఎలెక్ట్రానిక్‌ వస్తువుల అవసరం అమాంతం పెరిగిపోయింది. అధునాతన డ్రైవింగ్‌ సౌకర్యాలున్న మోటారు వాహనాలకూ గిరాకీ హెచ్చింది. ఇవన్నీ మైక్రోచిప్‌లు లేనిదే పనిచేయవు. ఒక సాధారణ కారులో 200 వరకు చిప్‌లు ఉంటే, ఎలెక్ట్రిక్‌ కారుకు 3,000 చిప్స్‌ అవసరమవుతాయి. కార్ల కంపెనీలతోపాటు మొత్తం 169 రకాల పరిశ్రమలు చిప్‌ల కొరతతో సతమతమవుతున్నాయి. కొవిడ్‌ వల్ల సరఫరా గొలుసులు విచ్ఛిన్నం కావడం చిప్‌ల కొరతకు ప్రధాన కారణం. కొవిడ్‌ అనంతరం డిజిటల్‌ ఆర్థిక రథం చిప్‌ల చమురు లేనిదే ముందుకు కదలలేదు. ఆధునిక యుద్ధ విమానాలు, క్షిపణులు, నౌకలకు చిప్‌లే సారథులు. ఇంటర్నెట్‌ ఆఫ్‌ థింగ్స్‌ (ఐఓటీ), కృత్రిమ మేధ, తెలివైన (స్మార్ట్‌) కార్లు, పరిశ్రమలు, రోబోటిక్స్‌, డేటా కేంద్రాలకు మైక్రోచిప్‌లే ఊపిరి. నేడు ప్రపంచంలో చైనా తరవాత అత్యధిక సంఖ్యలో మొబైల్‌ ఫోన్లు తయారుచేస్తున్న భారతదేశం- ఆ ఫోన్లలో వాడే చిప్స్‌ను విదేశాల నుంచి దిగుమతి చేసుకోవలసి రావడం పెద్ద బలహీనత. అవసరమైన సెమీకండక్టర్లలో 40శాతం చైనా నుంచే దిగుమతి చేసుకొంటోంది. ప్రస్తుతం భారత్‌లో 200 కోట్ల డాలర్ల మైక్రోచిప్స్‌కు డిమాండ్‌ ఉండగా, 2025కల్లా ఆ గిరాకీ 10,000 కోట్ల డాలర్లకు చేరనుంది. వాటిని పూర్తిగా విదేశాల నుంచి దిగుమతి చేసుకోవాలంటే భారీగా చేతిచమురు వదులుతుంది.

స్వావలంబనకు దూరంగా...

చిప్‌ల విషయంలో స్వావలంబనకు గతంలో భారత్‌ చేసిన ప్రయత్నాలు విఫలమయ్యాయి. 2017లో భారత్‌లో సెమీకండక్టర్‌ కర్మాగారాలను స్థాపించడానికి ముందుకొచ్చే కంపెనీలకు సంబంధిత యంత్రాల దిగుమతిపై కస్టమ్స్‌ సుంకం రద్దు చేయనున్నట్లు కేంద్రం ప్రకటించినా ఎవరూ ఆసక్తి చూపలేదు. తరవాత 2020లోనూ ఆహ్వానం పలికింది. దానికి నిర్దేశించిన గడువు ఈ ఏడాది ఏప్రిల్‌ 30తో తీరిపోయినా ఒక్క సంస్థా ముందుకు రాలేదు. సెమీకండక్టర్‌ యూనిట్ల స్థాపనకు వందల కోట్ల డాలర్లు కావాలి. ఉత్పత్తి అనుసంధానిత ప్రోత్సాహ పథకం(పీఎల్‌ఐ), ఎలెక్ట్రానిక్‌ విడిభాగాలు, సెమీకండక్టర్ల ఉత్పత్తి ప్రోత్సాహ పథకం(స్పెక్స్‌) కింద సెమీకండక్టర్‌ కర్మాగారాల స్థాపనకు 50శాతం పెట్టుబడులు సమకూర్చి, పన్ను రాయితీలు ఇవ్వాలని కేంద్రం యోచిస్తోంది. ప్రస్తుతం ఇంటెల్‌, ఏఎండీ, శాంసంగ్‌ వంటి కంపెనీలు భారత్‌లో చిప్‌లను డిజైన్‌ చేయడానికి పరిమితమయ్యాయి. ఇకపై ఇక్కడే చిప్‌ల ఉత్పత్తి సైతం చేపట్టాల్సిందిగా తైవాన్‌ సెమీకండక్టర్‌ తయారీ సంస్థ(టీఎస్‌ఎంసీ), ఇంటెల్‌ తదితర దిగ్గజ కంపెనీలను కేంద్రం ఆహ్వానిస్తోంది. ప్రపంచ సంస్థల కోసం కాంట్రాక్టుపై చిప్‌ల తయారీలో టీఎస్‌ఎంసీ అగ్రగామి. ఈ ఒప్పంద ఉత్పత్తి మార్కెట్‌లో 51శాతం ఈ సంస్థకే సొంతం. ఆపిల్‌, ఇంటెల్‌, ఏఎండీ, క్వాల్‌కామ్‌ వంటి దిగ్గజాలకు ఈ సంస్థే చిప్‌లను సరఫరా చేస్తోంది. అత్యాధునిక ప్రాసెసర్ల ఉత్పత్తిలో 90శాతం వాటా టీఎస్‌ఎంసీదే. భారత్‌లో 750 కోట్ల డాలర్ల చిప్‌ కర్మాగారాన్ని ఏర్పాటు చేసేలా ఈ సంస్థను ఒప్పించడానికి కేంద్ర ప్రభుత్వం గట్టిగా కృషి చేస్తోంది. అందులో సగం పెట్టుబడిని సమకూర్చడానికీ సిద్ధమైనట్లు వినికిడి. తైవాన్‌ తనదేనంటున్న చైనా ఈ ప్రయత్నాలపై గుర్రుగా ఉంది. అన్ని దేశాల్లాగే చైనా సైతం సెమీకండక్టర్ల కొరతను ఎదుర్కొంటోంది. అమెరికా రూపొందించిన చిప్స్‌ను చైనాకు ఎవరూ ఎగుమతి చేయకూడదని గతంలో డొనాల్డ్‌ ట్రంప్‌ ప్రభుత్వం ఆంక్షలు విధించడమే దీనికి కారణం.

నేనున్నానంటున్న టాటా

సెమీకండక్టర్‌ కర్మాగార స్థాపనకు భూమి, పుష్కలంగా నీరు, నిరాటంక విద్యుత్‌ కీలకం. నిపుణ మానవ వనరుల సంగతి సరేసరి. ఇలా అన్ని వనరులూ ఉన్న ప్రదేశాల కోసం కేంద్రం అన్వేషిస్తోంది. మరోవైపు ఈ కర్మాగారాల నుంచి కర్బన ఉద్గారాలు చాలా ఎక్కువగా వెలువడి వాతావరణంపై ప్రతికూల ప్రభావం చూపుతాయి. ఉదాహరణకు టీఎస్‌ఎంసీ ఒక్కటే తైవాన్‌ విద్యుదుత్పాదనలో అయిదు శాతాన్ని, 6.3 కోట్ల టన్నుల నీటిని ఉపయోగించుకొంటోంది. అధునాతన నియంత్రణ చర్యలతో పర్యావరణ నష్టాన్ని అదుపు చేయడమూ తప్పనిసరి. ఏదిఏమైనా రేపటి ప్రపంచానికి సెమీకండక్టర్లే చోదకశక్తి అనడంలో సందేహం లేదు. పొరుగు సేవలకు సెమీకండక్టర్ల కూర్పు, టెస్టింగ్‌ (ఒశాట్‌) కోసం టాటా గ్రూపు 30 కోట్ల డాలర్ల (రూ.2.25వేల కోట్ల)తో స్వదేశంలో ఒక కర్మాగార స్థాపనకు సిద్ధమైంది. సెమీకండక్టర్‌ ఫౌండ్రీల నుంచి సిలికాన్‌ పొరలు తెచ్చి ఈ కర్మాగారంలో కూర్పు చేస్తారు. దీన్ని తెలంగాణ, కర్ణాటక, తమిళనాడుల్లో ఎక్కడ ఏర్పాటు చేయాలో త్వరగా తేల్చి 2022 చివరికల్లా కార్యకలాపాలు ప్రారంభించాలని టాటా గ్రూపు భావిస్తోంది. ఏఎండీ, ఎస్‌టీ మైక్రోఎలెక్ట్రానిక్స్‌ వంటి సంస్థల కోసం ఈ కర్మాగారం ఒప్పంద ఉత్పత్తి చేపట్టవచ్చు. దీనివల్ల భారతదేశంలో మైక్రోచిప్‌ ఉత్పత్తికి పునాదిపడి ఇతర కంపెనీలూ రంగప్రవేశం చేయడానికి వీలవుతుంది.

- కైజర్‌ అడపా


+

© 1999- 2022 Ushodaya Enterprises Pvt.Ltd,All rights reserved.
Powered By Margadarsi Computers

Android PhonesApple Phones

For Editorial Feedback - eMail: infonet@eenadu.net
For Digital Marketing enquiries Contact :
040 - 23318181 eMail :marketing@eenadu.net
Best Viewed In Latest Browsers

Terms & Conditions   |   Privacy Policy

For Editorial Feedback - eMail: infonet@eenadu.net
For Digital Marketing enquiries Contact : 040 -
23318181 eMail :marketing@eenadu.net
Best Viewed In Latest Browsers
Terms & Conditions   |   Privacy Policy
Contents of eenadu.net are copyright protected.Copy and/or reproduction and/or re-use of contents or any part thereof, without consent of UEPL is illegal.Such persons will be prosecuted.