Jamal Khashoggi: జమాల్‌ హంతకులకు అమెరికాలో శిక్షణ
close

తాజా వార్తలు

Published : 23/06/2021 16:07 IST

Jamal Khashoggi: జమాల్‌ హంతకులకు అమెరికాలో శిక్షణ

ఇంటర్నెట్‌డెస్క్‌: వాషింగ్టన్ పోస్ట్‌ కాలమిస్ట్‌ జమాల్‌ ఖషోగీ హత్యలో పాల్గొన్న హంతకులు అమెరికాలోనే శిక్షణ పొందినట్లు తేలింది. ఈ విషయాన్ని న్యూయార్క్‌టైమ్స్‌ వెలుగులోకి తెచ్చింది. ఈ హత్యలో పాల్గొన్న నలుగురు హంతకులకు అమెరికాలోని టైర్‌ 1 గ్రూప్‌ అనే ప్రైవేటు భద్రతా సంస్థ నుంచి 2014లో పారామిలటరీ శిక్షణ లభించింది. దీనికి నాటి అధ్యక్షుడు ఒబామా కార్యవర్గం ఆమోద ముద్ర కూడా వేసింది. వీరి శిక్షణ ట్రంప్‌ అధ్యక్షుడిగా బాధ్యతలు స్వీకరించే వరకు కొనసాగినట్లు ఆ పత్రిక పేర్కొంది. 

టైర్‌ 1 గ్రూప్‌ కంపెనీకి మాతృ సంస్థ అయిన సెర్బరస్‌ క్యాపిటల్‌ మేనేజ్‌మెంట్‌ సంస్థలోని లూయిస్ బెర్మర్‌ అనే అత్యున్నత అధికారి పెంటగాన్‌లో ఉద్యోగం కోసం దరఖాస్తు చేసుకొనేందుకు ఈ శిక్షణకు సంబంధించిన పత్రాలు సమర్పించారు. ఇప్పుడు అవి వెలుగులోకి రావడంతో అసలు విషయం బయటపడింది. ఇది నిజమైన పత్రమే అని లూయిస్‌ కూడా ధ్రువీకరించారు. కాకపోతే టైర్‌ 1 గ్రూప్‌ ఆత్మరక్షణకు సంబంధించిన శిక్షణ మాత్రమే ఇచ్చిందని ఆయన వివరించారు. ఆ హంతకులు తర్వాత చేసిన పనితో సంబంధం లేదని పేర్కొన్నారు. లూయిస్‌ కథనం ప్రకారం ఇద్దరు వ్యక్తులు 2014-15 వరకు, ఆ తర్వాత ఆ ఇద్దరితో పాటు మరో ఇద్దరు వచ్చి 2017లో శిక్షణ తీసుకొన్నట్లు తెలుస్తోంది.

హత్యకు గురైన వాషింగ్టన్‌ పోస్ట్‌ కాలమిస్టు జమాల్‌ ఖషోగీ ఒకప్పుడు సౌదీ రాజకుటుంబానికి సన్నిహితుడు. కానీ ఆ తర్వాత వారిని వ్యతిరేకిస్తూ అమెరికా పారిపోయాడు. అక్కడి నుంచి సౌదీ కుటుంబంపై కథనాలు రాసేవాడు. టర్కీలోని ఇస్తాంబుల్‌లో గల సౌదీ అరేబియా దౌత్య కార్యాలయంలో 2018 అక్టోబరు 2న ఖషోగీ దారుణ హత్యకు గురైన విషయం తెలిసిందే. ఈ హత్య వెనుక సౌదీ యువరాజు మహ్మద్‌ బిన్‌ సల్మాన్‌(ఎంబీఎస్‌) హస్తం ఉందని గతంలో ఆరోపణలు వచ్చాయి. ఇటీవల అమెరికా ఇంటెలిజెన్స్‌ విభాగం కూడా ఇదే విషయాన్ని వెల్లడించింది. ఎంబీఎస్‌ అనుమతి లేకుండా సిబ్బంది ఇలాంటి ఆపరేషన్లు చేపట్టే అవకాశం లేదని పేర్కొంది. ఈ నివేదికను కాంగ్రెస్‌లో సమర్పించిన తర్వాత సౌదీపై అమెరికా కీలక నిర్ణయం తీసుకుంది. ఆ దేశానికి చెందిన 76 మంది వ్యక్తులపై ‘ఖషోగీ బ్యాన్‌’ పేరుతో అమెరికా విదేశాంగ మంత్రి ఆంటోనీ బ్లింకెన్‌ వీసా ఆంక్షలు విధించారు.


Tags :

మరిన్ని

జిల్లా వార్తలు
బిజినెస్
మరిన్ని
సినిమా
మరిన్ని
క్రైమ్
మరిన్ని
క్రీడలు
మరిన్ని
పాలిటిక్స్
మరిన్ని
జనరల్
మరిన్ని