రాంచీ: భారత్‌-దక్షిణాఫ్రికా మధ్య జరుగుతున్న మూడో టెస్టు తొలి ఇన్నింగ్స్‌లో పర్యాటక జట్టు ఐదు వికెట్లను కోల్పోయింది. 28వ ఓవర్లో జడేజా వేసిన నాలుగో బంతిని ఆడిని హంజా(62) బౌల్డ్‌ అయ్యాడు. తర్వాతి ఓవర్లో నదీమ్‌ వేసిన రెండో బంతిని ఆడిన బవుమా(32) స్టంప్‌ఔట్‌ అయ్యాడు. ఆట మొదలైన వెంటనే డుప్లెసిస్‌ వికెట్‌ కోల్పోయి కష్టాల్లో పడ్డ సఫారీ జట్టును హంజా-బవుమా జోడీ ఆదుకుంది. సుమారు 22 ఓవర్ల పాటు క్రీజులో నిలబడి వికెట్లు కోల్పోకుండా అడ్డుకున్నారు. ఇద్దరూ కలిసి 91 పరుగుల భాగస్వామ్యాన్ని నెలకొల్పారు. సగం వికెట్లు కోల్పోయిన దక్షిణాఫ్రికా 28 ఓవర్లు పూర్తి అయ్యేసరికి 107 పరుగులు చేసింది.