బొజ్జ గణపయా... ఆరగించవయ్యా!

ఆవ పులిహోర

తయారుచేసే విధానం
* బియ్యం కడిగి పది నిమిషాలు నానబెట్టి ప్రెషర్‌కుక్కర్‌లో ఉడికించి దించి వెడల్పాటి ప్లేటులో పరిచినట్లు వేయాలి. అందులోనే నువ్వుల నూనె వేసి కలిపి ఉంచాలి.
* చింతపండు నానబెట్టి గుజ్జు తీసి పక్కన ఉంచాలి.
* ఆవాలు వేయించి తీసి పొడి చేసి ఉంచాలి.
* మందపాటి బాణలిలో తాలింపుకోసం తీసుకున్న నూనె వేసి కాగాక ఆవాలు, పల్లీలు వేసి వేగాక సెనగపప్పు, మినప్పప్పు, ఎండుమిర్చి, పచ్చిమిర్చి ముక్కలు వేసి వేయించాలి. తరవాత కరివేపాకు, నువ్వులు, ఇంగువ, పసుపు వేసి ఓ నిమిషం వేగాక చింతపండు గుజ్జు వేసి ఉడికించాలి. బెల్లంకూడా వేసి నూనె బయటకు వచ్చేవరకూ ఉడికించి చల్లారనివ్వాలి. ఇప్పుడు అన్నంలో ఆవపొడి, ఉప్పువేసి కలిపాక చింతపండు మిశ్రమం వేసి బాగా కలిపితే సరి.

పాల తాలికలు

తయారుచేసే విధానం
* బెల్లం తురుములో కొద్దిగా నీళ్లు పోసి మరిగించి దించి పక్కన ఉంచాలి.
* తాలికలకోసం పాన్‌లో నీళ్లు, పాలు పోసి, చక్కెర, నెయ్యి వేసి మరిగించాలి. తరవాత స్టవ్‌ ఆఫ్‌ చేసి బియ్యప్పిండి వేసి కలుపుతూ ఉండలు కట్టకుండా కలపాలి. ఇందులో టేబుల్‌స్పూను పిండిని విడిగా తీసుకుని అందులో పావుకప్పు నీళ్లు పోసి కలిపి పక్కన ఉంచాలి. మిగిలిన మిశ్రమాన్ని చక్కిడాల గిద్దలో పెట్టాలి.
* బాణలిలో నెయ్యి వేసి జీడిపప్పు, కిస్‌మిస్‌ వేసి వేయించి తీయాలి. తరవాత పాలు పోసి మరిగించాలి. ఇప్పుడు చక్కిడాల గిద్దతో పిండిని పాలల్లోకి తాలికల్లా వత్తాలి. అవి కాస్త గట్టిపడ్డాయి అనుకున్నాక మెల్లగా కలుపుతూ ఉడికించాలి. పూర్తిగా ఉడికిన తరవాత పక్కన ఉంచిన బియ్యపుపిండి నీళ్లను పోసి మరోసారి కలిపి వేయించిన జీడిపప్పు, కిస్‌మిస్‌, యాలకులపొడి వేసి కలపాలి. చివరగా కరిగించిన బెల్లం పాకాన్ని పోసి కలిపి దించాలి.

అన్నం పాయసం

తయారుచేసే విధానం
* ప్రెషర్‌కుక్కర్‌లో కడిగిన బియ్యం వేసి మూడు కప్పుల కొబ్బరి పాలు పోసి ఉడికించాలి. తరవాత తరిగిన బెల్లం వేసి కలపాలి. ఇప్పుడు మిగిలిన కొబ్బరి పాలు పోసి సిమ్‌లో రెండుమూడు నిమిషాలు ఉడికించాలి. విడిగా ఓ బాణలిలో నెయ్యి వేసి జీడిపప్పు వేయించాలి. తరవాత జాజికాయ పొడి కూడా వేసి రెండూ కలిపి పాయసంలో వేసి కలపాలి. చివరగా యాలకులపొడి కూడా వేసి కలిపి దించాలి.

రవ్వ పొంగలి

తయారుచేసే విధానం
* పెసరపప్పు కడిగి కుక్కర్‌లో వేసి అరకప్పు నీళ్లు పోసి ఉడికించాలి.
* నాన్‌స్టిక్‌ పాన్‌లో టేబుల్‌స్పూను నెయ్యి వేసి రవ్వ వేసి వేయించాలి. మంచి వాసన వచ్చాక తీసి పక్కన ఉంచాలి. అదే పాన్‌లో మిగిలిన నెయ్యి వేసి జీలకర్ర, మిరియాలు, కరివేపాకు వేసి వేగాక అల్లం తురుము కూడా వేసి వేయించాలి. ఇప్పుడు మిగిలిన నీళ్లు పోసి, ఉప్పు వేసి మరిగించాలి. తరవాత రవ్వవేసి కలుపుతూ ఉడికించాలి. ఉడికించిన పెసరపప్పు కూడా వేసి బాగా కలిపి సిమ్‌లో కాసేపు ఉడికించి, వేయించిన జీడిపప్పు చల్లి దించాలి.