అరటికాయ కోఫ్తా కర్రీ

కావాల్సినవి: అరటికాయలు- నాలుగు, అల్లంవెల్లుల్లి ముద్ద- రెండు చెంచాలు, సెనగపిండి- రెండు పెద్ద చెంచాలు, కొత్తిమీర- పావు కప్పు, ఎర్ర మిరప పొడి- రెండు చెంచాలు, ఉప్పు- తగినంత, నూనె- మూడు పెద్ద చెంచాలు, బిర్యానీ ఆకు- ఒకటి, తరిగిన ఉల్లిపాయ- ఒకటి (పెద్దది), పసుపు- అర చెంచా, తరిగిన టొమాటో- ఒకటి, గరంమసాలా- అర చెంచా.

తయారీ: అరటి కాయలని ముక్కలుగా కోసి కుక్కర్‌లో ఒక కూత వచ్చేవరకు ఉడకబెట్టి, చల్లారిన తర్వాత తొక్క తీసేసి, పూర్తిగా మెదపాలి. ఈ గుజ్జులో సెనగపిండి, తరిగిన కొత్తిమీర, అల్లంవెల్లుల్లి ముద్ద, కారం, ఉప్పు కలపాలి. ఈ మిశ్రమాన్ని పది, పన్నెండు ఉండలుగా చేసుకోవాలి. కడాయిలో సరిపడా నూనె వేసి వేడయ్యాక ఉండలుగా చేసిన కోఫ్తాలను మీడియం మంట మీద బంగారు రంగు వచ్చేవరకు వేయించుకుని పక్కకు పెట్టుకోవాలి. పెద్ద చెంచా నూనె వేడి చేసి, బిర్యానీ ఆకు, తరిగిన ఉల్లిపాయ ముక్కలను వేసి రెండు నిమిషాలు వేయించుకోవాలి. ఆ తర్వాత మిగిలిన అల్లం, వెల్లుల్లి ముద్ద వేసి, వేయించాలి. మిగిలిన కారం, పసుపు, టొమాటో ముక్కలను వేసి తక్కువ మంట మీద ఉడికించాలి. రెండు కప్పుల నీళ్లు, రుచికి సరిపడా ఉప్పు వేసి నూనె పైకి తేలే వరకు గ్రేవీని మరిగించాలి. ఆ తర్వాత మంటను తగ్గించి కోఫ్తాలను వేయాలి. అయిదు నిమిషాలు చిన్న మంటపై ఉడికించుకోవాలి. అందులో గరంమసాలా వేసి కొత్తిమీరతో అలంకరించి వేడి వేడిగా సర్వ్‌ చేయాలి.

• Banana kofta
• Banana
• Ginger garlic
• Coriander
• Onion
• అరటికాయ కోఫ్తా
• అరటికాయలు
• అల్లంవెల్లుల్లి
• కొత్తిమీర
• ఉల్లిపాయలు