ధైర్యానికి మెచ్చారు...

జి.హిమప్రియ

పాతశ్రీకాకుళం, న్యూస్‌టుడే: ఏటా కేంద్రప్రభుత్వం, మహిళా శిశుసంక్షేమశాఖ ఆధ్వర్యంలో ధైర్యసాహసాలు ప్రదర్శించే విద్యార్థులకు ప్రధానమంత్రి రాష్ట్రీయ బాల పురస్కారాలను ప్రదానం చేస్తుంది. ఈసారి శ్రీకాకుళం మండలం పొన్నాం గ్రామానికి చెందిన జి.సత్యనారాయణ, పద్మావతి దంపతుల కుమార్తె హిమప్రియ 12 ఏళ్ల వయసులోనే ఆ గుర్తింపు దక్కించుకుంది. ఈమె తండ్రి ఆర్మీలో పనిచేస్తున్నారు. ఉద్యోగరీత్యా 2018లో జమ్మూలోని ఆర్మీ క్వార్టర్స్‌లో కుటుంబంతో కలిసి ఉండేవారు. ఆ సంవత్సరం ఫిబ్రవరి 10న ఉదయం 5 గంటల సమయంలో తీవ్రవాదులు వారి క్వార్టర్స్‌పై భారీ మారణాయుధాలతో దాడి చేశారు. ఆ సమయంలో ఇంటిలో హిమప్రియ తల్లితో ఉంది. గాయాలపాలైనప్పటికీ విద్యార్థిని ధైర్య సాహసాలు ప్రదర్శించి తీవ్రవాదులను ఎదుర్కొంటూ,  తల్లితో పాటు క్వార్టర్స్‌లోని కొంతమందిని కాపాడే ప్రయత్నం చేసింది. ఈ నెల 24న జాతీయ బాలికా దినోత్సవాన్ని పురస్కరించుకుని ప్రధానమంత్రి నరేంద్రమోదీ వర్చువల్‌ విధానంలో ప్రశంసాపత్రంతో పాటు రూ.లక్ష బహుమతి అందజేయనున్నారని కలెక్టర్‌ శ్రీకేష్‌ బి.లఠ్కర్‌ శనివారం తెలిపారు.