రేవుల్లో ఇష్టారీతిన ఇసుక తవ్వొద్దు

రవాణాను అడ్డుకున్న వైకాపా నేతలు

ఈనాడు డిజిటల్‌, కడప, న్యూస్‌టుడే-పెండ్లిమర్రి: నిబంధనలకు విరుద్ధంగా ఇసుక తవ్వకం, అక్రమ రవాణాపై పులివెందుల, కమలాపురం నియోజకవర్గాలకు చెందిన అధికార పార్టీ నేతలు కన్నెర్ర చేశారు. కమలాపురం నియోజకవర్గం పెండ్లిమర్రి మండలం కొత్త గంగిరెడ్డిపల్లె రేవులో ఇసుక ఇష్టారాజ్యంగా తోడుతుండటంతో మంగళవారం ఆయా వాహనాలను అడ్డుకుని రవాణా నిలిపివేశారు. యంత్రాలు ఉపయోగించి అత్యంత లోతులో, హద్దులు లేకుండా ఎక్కడపడితే అక్కడ తవ్వుకుపోతున్నారని వారు ఆక్షేపించారు. కొత్తగా నందిమండలం నుంచి తువ్వపల్లె మీదుగా అల్‌రెడ్డిపల్లె మార్గంలో టిప్పర్ల రాకపోకలతో రహదారి ధ్వంసమవుతోందని వాపోయారు. నిబంధనలు ఉల్లంఘిస్తున్నారని వైకాపా ఎంపీటీసీ సభ్యుడు ప్రదీప్‌కుమార్‌రెడ్డి పేర్కొన్నారు. ఈ సందర్భంగా రేవు నిర్వాహకులు, నేతల మధ్య వివాదం చోటు చేసుకుంది. పోలీసులు రంగ ప్రవేశం చేసి ఇరువర్గాలకు సర్దిచెప్పారు.