ఆ ఆరుగురినీ విచారించండి

వివేకా హత్య కేసులో నిందితుడు దేవిరెడ్డి శివశంకర్‌రెడ్డి భార్య తులసమ్మ విన్నపం

ఈనాడు డిజిటల్‌, కడప, న్యూస్‌టుడే, పులివెందుల: మాజీ మంత్రి వైఎస్‌ వివేకానందరెడ్డి హత్య కేసును దర్యాప్తు చేస్తున్న సీబీఐ.. కేవలం ఒక కోణంలోనే విచారణ జరుపుతూ తప్పుదోవ పట్టిస్తోందని, ఈ కేసులో అయిదో నిందితుడు దేవిరెడ్డి శివశంకర్‌రెడ్డి భార్య తులసమ్మ పులివెందుల కోర్టుకు విన్నవించారు. హత్య కుట్రలో వివేకా అల్లుడు రాజశేఖర్‌రెడ్డితోపాటు ఆరుగురి ప్రమేయంపై సీబీఐ విచారణ జరిపే విధంగా ఆదేశాలివ్వాలని గతంలో ఆమె పిటిషన్‌ వేశారు. ఈ పిటిషన్‌పై 9 నెలల అనంతరం శనివారం విచారణ చేపట్టిన కోర్టు.. ఆమె వాంగ్మూలాన్ని నమోదు చేసింది. తదుపరి విచారణను వచ్చే నెల 24వ తేదీకి వాయిదా వేసింది. ఈ కేసుతో తన భర్త దేవిరెడ్డికి ఎలాంటి సంబంధం లేదని తులసమ్మ పేర్కొన్నారు. పిటిషన్‌లో పేర్కొన్న వివరాలను కడపలో శనివారం ఆమె తరపు న్యాయవాది రవీందర్‌రెడ్డి మీడియాకు వెల్లడించారు.