తలచుకుంటే సంక్షేమ పథకాలు అందకుండా చేస్తా: వైకాపా ఎమ్మెల్యే

విడవలూరు, న్యూస్‌టుడే: కొందరు ప్రభుత్వ సంక్షేమ పథకాలు పొంది కూడా వైకాపా ప్రభుత్వాన్ని విమర్శిస్తున్నారని నెల్లూరు జిల్లా కోవూరు ఎమ్మెల్యే నల్లపురెడ్డి ప్రసన్నకుమార్‌రెడ్డి మండిపడ్డారు. తాను తలచుకుంటే వారి సంక్షేమ పథకాలు ఆపేయగలనని.. కానీ, అలా చేయబోనని అన్నారు. విడవలూరు మండలం దండిగుంట, వరిణి గ్రామాల్లో గడపగడపకు కార్యక్రమం ఆదివారం నిర్వహించారు. రామతీర్థంలో రెండు రోజుల క్రితం తెదేపా వారు నిర్వహించిన ‘ఇదేం ఖర్మ మన రాష్ట్రానికి’ కార్యక్రమంలో పాల్గొని ఓ మహిళ ప్రభుత్వంపై విమర్శలు చేయడంపై ఆగ్రహించారు. ఆమె కుటుంబసభ్యులు అనేక ప్రభుత్వ సంక్షేమ పథకాలను పొంది సీఎంను విమర్శిస్తున్నారంటూ మండిపడ్డారు. ఆమె భర్త పంచాయతీలో పంపు ఆపరేటర్‌గా విధులు నిర్వహిస్తున్నారని, ఆయన్ను వెంటనే విధుల్లోనుంచి తొలగించాలని అధికారులను ఆదేశించారు.