అదనపు దూరానికి రైతులు డబ్బు కట్టాల్సిందే

‘వైఎస్సార్‌ జలకళ’పై ఉప ముఖ్యమంత్రి ముత్యాలనాయుడు

ఈనాడు, అమరావతి: వైఎస్సార్‌ జలకళ పథకం కింద వ్యవసాయ విద్యుత్‌ కనెక్షన్లను ప్రభుత్వం ఉచితంగా ఇస్తుందని.. అయితే, 180 మీటర్ల వరకు (మూడు విద్యుత్‌ స్తంభాలు, తీగలు, ఇతర సామాగ్రి) అయ్యే ఖర్చును మాత్రమే భరిస్తామని ఉప ముఖ్యమంత్రి బూడి ముత్యాలనాయుడు పేర్కొన్నారు. వైఎస్సార్‌ జలకళ పథకం అమలు తీరుపై ఆదివారం మండలిలో సభ్యులు అడిగిన ప్రశ్నకు మంత్రి సమాధానమిస్తూ.. ‘‘సన్న, చిన్నకారు రైతులకు బోరు ఉచితంగా తవ్విస్తాం. మోటారు, విద్యుత్‌ కనెక్షన్‌ కూడా ఉచితంగా ఇస్తాం. రైతు పొలానికి కనెక్షన్‌ ఇవ్వడానికి 180 మీటర్ల దూరం వరకు మాత్రమే మెటీరియల్‌ను డిస్కంలు భరిస్తాయి. మూడు నాలుగు కిలో మీటర్ల దూరంలో రైతు పొలం ఉంటే.. అక్కడి వరకు విద్యుత్‌ లైన్లు వేసి కనెక్షన్లు ఇవ్వమంటే ఎలా? నిబంధనకు మించి ఉన్న దూరానికి లైన్లు వేయడానికి ఏర్పాటు చేసే స్తంభాలు, తీగలకు అయ్యే ఖర్చును రైతులే భరించాలి’’ అని ఉపముఖ్యమంత్రి పేర్కొన్నారు.