ఎకరా స్థలంలో 35 రకాల వరి వంగడాలు

పూర్వకాలం నాటి వివిధ రకాల ధాన్యాలను జనబాహుళ్యంలోకి తీసుకువచ్చేందుకు కృషి చేస్తున్నారు ప్రకాశం జిల్లా సింగరాయకొండ మండలం పాకల గ్రామానికి చెందిన రైతు షేక్‌వలీ సుభానీ. పదో తరగతి చదివినప్పటికీ ప్రకృతి సేద్యం అంటే ఇష్టం. ఔషధ గుణాలు, పోషక విలువలు కలిగి.. మధుమేహాన్ని నివారించే 35 రకాల దేశీయ వరి వంగడాలను సేకరించారు. ఎకరా విస్తీర్ణంలో ఒక్కో వరి రకం మూడు నాలుగు సెంట్ల స్థలంలో వేశారు. ఎక్కడ వ్యవసాయ ప్రదర్శనలు జరిగినా వెళ్లి అరుదైన వరి కంకులను సేకరించడం అలవాటు. కర్ణాటక, కేరళ, గుజరాత్‌, మహారాష్ట్ర, ఈశాన్య రాష్ట్రాల్లో అరుదుగా లభించే దేశవాళీ రకాలైన కాలబట్టి, కాలజీర, బర్మాబ్లాక్‌, కర్పూరకవని, అస్సామినీల, నవారా, మాపిళైసాంబ, పుంగార్‌, రక్తశాలి వంటి రకాలను తన పొలంలో సేంద్రియ పద్ధతిలో సాగు చేస్తున్నారు.

ఈనాడు, ఒంగోలు