Omicron:రెట్టింపు వేగం

ఒక్క రోజులో 1,831 నుంచి 3,205కు చేరిన కేసులు

ఈనాడు, అమరావతి: రాష్ట్రంలో కొవిడ్‌ కేసులు రోజురోజుకూ పెరిగిపోతున్నాయి. మంగళవారం ఉదయం 9 నుంచి బుధవారం ఉదయం 9 గంటల మధ్య 41,954 నమూనాలు పరీక్షించగా 3,205మందికి వైరస్‌ నిర్ధారణైంది. పాజిటివిటీ రేటు 7.63%గా నమోదైంది. జనవరి 1న 0.57%గా ఉన్న      పాజిటివిటీ రేటు మంగళవారం 5.02 శాతానికి   ఎగబాకింది. బుధవారానికి మరో 2.6% పెరగడం వ్యాధి తీవ్రతను తెలియజేస్తోంది. తాజా కేసులను బట్టి అత్యధికంగా విశాఖ జిల్లాలో పాజిటివిటీ రేటు 19.42% (695 కేసులు) నమోదు కాగా, చిత్తూరు, కడప, నెల్లూరు జిల్లాల్లోనూ 10% దాటింది. విశాఖ నగరంలో వ్యాధి ఉద్ధృతి తీవ్రంగా ఉంది. యాత్రికుల రాకపోకలు, ప్రభుత్వ కార్యక్రమాలు, సరిహద్దు రాష్ట్రాల నుంచి తాకిడి కారణంగా చిత్తూరు జిల్లాలో కేసులు పెరుగుతున్నాయి. కొవిడ్‌ బాధితుల్లో అత్యధికులు ఇళ్లల్లోనే ఉంటూ చికిత్స పొందుతున్నారు.