LIC IPO: ఎల్‌ఐసీ ఐపీఓకు 1.66 రెట్ల స్పందన.. దరఖాస్తుకు రేపే ఆఖరు రోజు

దిల్లీ: ఎల్‌ఐసీ ఐపీఓ నాలుగో రోజైన శనివారం నాటికి మొత్తం అన్ని విభాగాల్లో కలిపి 1.66 రెట్ల స్పందన లభించింది. 16,20,78,067 షేర్లను ఆఫర్‌ చేయగా, 26,83,18,335 షేర్లకు బిడ్లు దాఖలయ్యాయి. ఎన్‌ఐఐ (సంస్థాగతేతర మదుపర్ల) విభాగం నుంచీ పూర్తి స్పందన లభించింది. వీరికి 2,96,48,427 షేర్లను రిజర్వ్‌ చేయగా, 3,21,59,055 షేర్లకు (1.08 రెట్లు) బిడ్లు దాఖలైనట్లు స్టాక్‌ ఎక్స్ఛేంజీల వద్ద లభ్యమవుతున్న సమాచారం ప్రకారం తెలుస్తోంది. అర్హులైన సంస్థాగత మదుపర్ల (క్యూఐబీ) విభాగంలో మాత్రం 67 శాతం స్పందనే లభించింది. రిటైల్‌ వ్యక్తిగత మదుపర్లకు 6.9 కోట్ల షేర్లను కేటాయించగా,    10.06 కోట్ల షేర్లకు (1.46 రెట్లు) బిడ్లు దాఖలయ్యాయి. పాలసీదార్ల విభాగంలో 4.67 రెట్లు, ఉద్యోగుల విభాగంలో 3.54 రెట్ల స్పందన లభించింది. ఈ ఐపీఓకు దరఖాస్తులు సమర్పించేందుకు సోమవారం చివరి రోజు.