ఐటీసీ తుది డివిడెండ్‌ 625 శాతం

దిల్లీ: మార్చి త్రైమాసికానికి రూ.4259.68 కోట్ల నికరలాభాన్ని ఐటీసీ లిమిటెడ్‌ ప్రకటించింది. 2020-21 ఇదే కాల లాభం రూ.3816.84 కోట్ల కంటే ఇది 11.60 శాతం అధికం. ఇదే సమయంలో కార్యకలాపాల ఆదాయం రూ. 15404.37 కోట్ల నుంచి 15.25 శాతం పెరిగి రూ.17754.02 కోట్లకు చేరింది. వ్యయాలు కూడా రూ.10994.64 కోట్ల నుంచి 15.41 శాతం అధికమై రూ.12632.29 కోట్లకు చేరాయి. 2021-22 పూర్తి ఆర్థిక సంవత్సరానికి నికరలాభం రూ.15485.65 కోట్లుగా నమోదైంది. 2020-21లో ఇది రూ.13389.8 కోట్లు మాత్రమే. ఆదాయం కూడా రూ.53,155.12 కోట్ల నుంచి రూ.65204.96 కోట్లకు చేరింది. గత ఆర్థిక సంవత్సరానికి 1 రూపాయి ముఖ విలువ కలిగిన ప్రతి షేరుకు తుది డివిడెండుగా రూ.6.25 (625 శాతం) ఇవ్వాలని డైరెక్టర్ల బోర్డు నిర్ణయించింది. మార్చిలో ఇచ్చిన రూ.5.25 కలుపుకుంటే, 2021-22కు మొత్తం రూ.11.50 డివిడెండ్‌ ఇచ్చినట్లు అవుతుంది.