Indigo: ఇండిగో ఘనత.. ఏడాదిలో 10 కోట్ల మంది ప్రయాణికులు

Indigo | ముంబయి: దేశీయ విమానయాన సంస్థ ఇండిగో (Indigo) అరుదైన ఘనత సాధించింది. ఒక్క ఏడాది (క్యాలెండర్‌)లో 10 కోట్ల మంది ప్రయాణికులను గమ్యస్థానాలకు చేరవేసింది. ఈ ఫీట్‌ సాధించిన తొలి దేశీయ విమానయాన సంస్థగా గుర్తింపు పొందింది. ఈ ఏడాదే 17వ వసంతాన్ని పూర్తి చేసుకున్న ఇండిగో సంస్థ.. తక్కువ కాలంలో ఈ ఘనత సాధించిన విమాయాన సంస్థగా నిలిచింది. 

ఈ అరుదైన ఘనతతో ట్రాఫిక్‌ పరంగా ప్రపంచంలోనే టాప్‌-10 ఎయిర్‌లైన్‌ సంస్థల జాబితాలో చేరినట్లు ఇండిగో ఓ ప్రకటనలో తెలిపింది. 2022 క్యాలెండర్‌ సంవత్సరంలో 7.8 కోట్ల మంది ఇండిగో విమానాల్లో ప్రయాణించారు. ఏడాదిలో 22 శాతం మంది ప్రయాణికులు పెరిగారు. ఒకే రోజు 2 వేల విమానాలు, 118 గమ్యస్థానాలు చేర్చిన ఘనత కూడా ఇండిగో సొంతమైంది. ఇందులో 32 అంతర్జాతీయ గమ్యస్థానాలు కూడా ఉన్నాయి. ఈ మైలురాయిని అందుకోవడం చాలా సంతోషంగా ఉందని ఇండిగో చీఫ్‌ ఎగ్జిక్యూటివ్‌ ఆఫీసర్‌ పీటర్‌ ఎల్బెర్స్‌ పేర్కొన్నారు.