మన ఎలక్ట్రానిక్స్‌లో చైనా, హాంకాంగ్‌ నుంచే 56%

ఇది ఆర్థిక భద్రతకు సవాలు: జీటీఆర్‌ఐ

దిల్లీ: గత ఆర్థిక సంవత్సరంలో మన ఎలక్ట్రానిక్స్‌, టెలికాం, ఎలక్ట్రికల్‌ ఉత్పత్తుల దిగుమతులు 89.8 బిలియన్‌ డాలర్లు (దాదాపు రూ.7.45 లక్షల కోట్లు)గా నమోదయ్యాయి. ఇందులో సగానికి పైగా (56%) చైనా, హాంకాంగ్‌ దేశాల నుంచే దిగుమతి అయ్యాయని ఆర్థిక మేధో సంస్థ జీటీఆర్‌ఐ తన నివేదికలో పేర్కొంది. చైనా నుంచే 43.9% ఎలక్ట్రానిక్స్‌, టెలికాం, విద్యుత్తు ఉత్పత్తులు వచ్చాయని వివరించింది. ఈ ఉత్పత్తుల కోసం ఈ రెండు దేశాలపై ఎన్నో ఏళ్లుగా భారత్‌ ఆధారపడి ఉందని  తెలిపింది. ఈ దేశాలపై ఆధారపడటాన్ని తగ్గించుకుంటేనే ఆర్థికంగా బలోపేతం కావడంతో పాటు, భారత డిజిటల్‌, సాంకేతిక సార్వభౌమత్వాన్ని రక్షించుకోగలమని ఆ నివేదిక అభిప్రాయపడింది. ఈ వస్తువుల కోసం చైనాపై ఆధారపడటం కొనసాగితే, అది దేశ వ్యూహాత్మక స్వయం ప్రతిపత్తి, ఆర్థిక భద్రతకు సవాళ్లను విసరగలదని హెచ్చరించింది. దేశీయ ఉత్పత్తి సామర్థ్యాలను పెంచుకోవడంతో పాటు, వివిధ వస్తువుల కోసం వ్యూహాత్మకంగా ఇతర దేశాల వైపు మళ్లాలని సూచించింది.

• ఎలక్ట్రానిక్స్‌ విభాగంలో ఇంటిగ్రేటెడ్‌ సర్క్యూట్ల దిగుమతి 2007-10 మధ్య 166.1 మి. డాలర్లు (సుమారు రూ.1380 కోట్లు)గా ఉండగా.. 2020-2022 కల్లా 4.2 బి. డాలర్ల (సుమారు రూ.35,000 కోట్ల)కు పెరిగింది. కంప్యూటర్లు, స్మార్ట్‌ఫోన్లలో వీటి వాడకం ఎక్కువ.
• ఫోన్లు, ఇతర వైర్‌లెస్‌ పరికరాల వంటి కమ్యూనికేషన్‌ డివైజెస్‌ల దిగుమతులు 3.691 బిలియన్‌ డాలర్ల (సుమారు రూ.30,700 కోట్ల)కు పెరిగాయి. ఈ మార్కెట్‌లో సగం వాటా చైనాదే.
• డయోడ్లు, ట్రాన్సిస్టర్లు, ఇదే తరహా సెమీకండక్టర్‌ డివైజెస్‌ల దిగుమతులు కూడా 113.3 మి. డాలర్ల (సుమారు రూ.940 కోట్ల) నుంచి 2334.8 మి. డాలర్ల (సుమారు రూ.19,400 కోట్ల)కు దూసుకెళ్లాయి. ఇందులో చైనా వాటా 67.5%.
• బ్యాటరీలు, ఇతరత్రా ఎలక్ట్రిక్‌ అక్యుములేటర్ల దిగుమతులు 254.2 మి. డాలర్ల (సుమారు రూ.2110 కోట్ల) నుంచి 1.4 బి. డాలర్ల (సుమారు రూ.11,600 కోట్ల)కు చేరగా.. ఇందులోనూ చైనాదే అధిక వాటా.

ఈ నేపథ్యంలో చైనాపై ఆధారపడడం తగ్గించుకోవాలని.. ఇది అత్యంత ప్రాధాన్యత, వ్యూహాత్మక అంశంగా గుర్తించాలని ఆ నివేదిక వివరించింది. దేశీయంగా సెమీకండక్టర్‌ తయారీని అభివృద్ధి చేసుకోవాలని తెలిపింది. డయోడ్లు, ట్రాన్సిస్టర్లు, ఎలక్ట్రిక్‌ అక్యుములేటర్ల స్థానిక తయారీ వేగవంతం చేయాలని.. ఇందు కోసం అంతర్జాతీయ టెక్‌ కంపెనీలతో సాంకేతిక బదిలీ/సంయుక్త సంస్థల స్థాపన దిశగా ఆలోచించాలని సూచించింది.