బైక్‌పై వెళ్తున్న తల్లీకుమారులను వెంబడించి.. వేట కొడవళ్లతో దాడి

అగలి: శ్రీ సత్యసాయి జిల్లాలో ద్విచక్రవాహనంపై వెళ్తున్న తల్లీ కుమారులపై కొంతమంది దుండగులు దాడి చేశారు. అగలి మండటం పి.బ్యాడిగెర సమీపంలో ఈ ఘటన చోటు చేసుకుంది. మొదట కారులో వచ్చిన దుండగులు కొడికొండ - సిరా జాతీయ రహదారిపై తల్లి మంగళమ్మ, కుమారుడు మారుతి కోసం కాపు కాశారు. ఇది గమనించిన ఇద్దరూ.. వారి నుంచి తప్పించుకునే ప్రయత్నం చేశారు. దీంతో దుండగులు కారులో వెంబడించి వేట కొడవళ్లతో వారిపై దాడి చేసి తీవ్రంగా గాయపరిచారు.

ఉల్లేకెర గ్రామ సమీపం వరకు సుమారు కిలోమీటర్‌ మేర తల్లీకుమారులను వెంబడించారు. అనంతరం వారిని వదిలేశారు. అక్కడనుంచి తప్పించుకున్న బాధితులు స్థానిక ఎస్సై లావణ్యకు సమాచారమిచ్చారు. పోలీసు సిబ్బంది ఘటన జరిగిన ప్రదేశానికి చేరుకుని.. వారిని సిరా ప్రభుత్వ ఆసుపత్రికి తరలించి చికిత్స అందించారు. ఘటనపై దర్యాప్తు చేస్తున్నట్లు పోలీసులు తెలిపారు.