Crime News: బోరునీళ్లు తాగాడని వృద్ధుడి ప్రాణాలు తీశారు..

బిహార్‌లో అమానవీయ ఘటన వెలుగుచూసింది. వైశాలి జిల్లా సేలంపుర్‌ ప్రాంతంలో తమ అనుమతి లేకుండా బోరునీళ్లు తాగాడని 70ఏళ్ల వృద్ధుడిని ఓ వ్యక్తి చితకబాదాడు. దీంతో తీవ్రంగా గాయపడిన ఆ వృద్ధుడు శనివారం తెల్లవారుజామున మృతి చెందాడు. ‘‘మా నాన్న పశువులకు గడ్డి తెచ్చేందుకు వెళ్లాడు. దాహం వేసి నీటి కోసం బోరుపంపు వద్దకు వెళ్లాడు. తమ అనుమతి లేకుండా నీళ్లు తాగాడన్న కోపంతో దాని యజమానులు మా నాన్నను కొట్టారు. తర్వాత అతను మరణించాడు. వారితో మాకు ఎలాంటి శత్రుత్వం లేదు’’ అని మృతుడి కుమారుడు రమేశ్‌ సైని పేర్కొన్నారు. ఈ ఘటనపై కేసు నమోదు చేసి.. దర్యాప్తు చేస్తున్నట్లు పోలీసులు తెలిపారు.