మిర్చి పొలంలో గంజాయి సాగు

నిందితుల్లో వైకాపా నాయకుడి బంధువు

గురజాల గ్రామీణ, న్యూస్‌టుడే: పల్నాడు జిల్లా గురజాల మండలం దైద గ్రామంలో గంజాయి సాగు వెలుగుచూసింది. గ్రామానికి చెందిన బాణావత్‌ అమరానాయక్‌, లావూరి శ్రీను నాయక్‌ కొంతకాలంగా మిరప పొలంలో గంజాయి సాగు చేస్తున్నారన్న సమాచారంతో శనివారం పిడుగురాళ్ల స్పెషల్‌ ఎన్‌ఫోర్సుమెంట్‌ బ్యూరో (ఎస్‌ఈబీ) సీఐ కొండారెడ్డి, గురజాల సెబ్‌ ఎస్సై జయరాం సిబ్బందితో కలిసి తనిఖీలు చేశారు. నిందితుల పొలాల్లో 10 కిలోల గంజాయి మొక్కలు, రెండు డ్రమ్ముల్లో నిల్వ ఉంచిన సుమారు 30 కిలోల గంజాయి పొడిని స్వాధీనం చేసుకున్నారు. వాటి విలువ రూ.3 లక్షల వరకు ఉంటుందని అంచనా. వారిద్దరినీ అదుపులోకి తీసుకున్నారు. అక్కడే సమీప ప్రాంతంలో మరో వ్యక్తి గంజాయి సేవిస్తుండగా సెబ్‌ అధికారులు గుర్తించి అదుపులోకి తీసుకున్నారు. నిందితుడు అమరానాయక్‌ వైకాపాకు చెందిన ఉప సర్పంచి నాగేశ్వరరావుకు స్వయాన సోదరుడు. అధికారపార్టీ అండదండలతో గంజాయి సాగు చేస్తున్నారని గ్రామస్థులు ఆరోపించారు.