Mumbai: బహుళ అంతస్తుల భవనంలో భారీ అగ్ని ప్రమాదం

ముంబయి:  దేశ ఆర్థిక రాజధాని ముంబయిలో (Mumbai) భారీ అగ్నిప్రమాదం (Fire Accident) జరిగింది. డోంబివలీ ప్రాంతంలోని ఓ బహుళ అంతస్తుల భవనంలో శనివారం ఉదయం మంటలు చెలరేగాయి. లోధా పలావ టౌన్‌షిప్‌లోని ఫేజ్‌-2లో ఈ ఘటన చోటుచేసుకుంది. సమాచారం అందుకున్న పోలీసులు, అగ్నిమాపక సిబ్బంది హుటాహుటిన  ఘటనా స్థలికి చేరుకొని పదిహేను అగ్నిమాపక శకటాలతో మంటలు ఆర్పివేశారు.  మధ్యాహ్నం 11 గంటల ప్రాంతంలో 13వ అంతస్తులో చెలరేగిన మంటలు 18వ అంతస్తు వరకు వ్యాపించాయి. ఆ అపార్ట్‌మెంట్‌ ఇంకా నిర్మాణ దశలోనే ఉండటంతో ప్రాణనష్టం తప్పింది. తొలి మూడు ఫ్లోర్లలో మాత్రమే కొన్ని కుటుంబాలు నివాసం ఉంటున్నాయి.  ప్రమాదం సంగతి తెలిసిన వెంటనే వాళ్లంతా సురక్షితంగా బయటకు వచ్చేశారు. మంటలు చెలరేగడానికి గల కారణాలపై పోలీసులు దర్యాప్తు చేస్తున్నారు.