నడిరోడ్డుపై దారుణహత్య

సీసీ కెమెరాలో దృశ్యాలు వెలుగులోకి

ఒంగోలు: ప్రకాశం జిల్లా కేంద్రమైన ఒంగోలులో పట్టపగలు నడిరోడ్డుపై థామస్ అనే యువకుడి హత్య జరిగిన విషయం తెలిసిందే. గాంధీ పార్క్ వద్ద జోసఫ్ అనే వ్యక్తి థామస్‌ను దారుణంగా కత్తితో పొడిచి హత్య చేసిన ఘటన సంచలనం సృష్టించింది. ఈ ఘటనకు సంబంధించిన సీసీ కెమెరా దృశ్యాలు ప్రస్తుతం సామాజిక మాధ్యమాల్లో హల్‌చల్‌ చేస్తున్నాయి.

 జోసఫ్ భార్య, థామస్ ఒంగోలులోని ఓ షాపింగ్‌మాల్ లో పనిచేస్తున్నారు. వీరిద్దరి మధ్య చిన్న గొడవ విషయమై జోసఫ్ యువకుడిపై పగ పెంచుకున్నాడు. ఈ నేపథ్యంలో మంగళవారం ఉదయం మాట్లాడదామని యువకుడిని పిలిపించిన జోసఫ్‌.. భార్య అడ్డుకుంటున్నా ఆగకుండా పలుమార్లు థామస్‌ను కత్తితో పొడిచి చంపాడు. దాడి నుంచి తప్పించేందుకు థామస్‌ ప్రయత్నించినా ఆగకుండా వెంటపడి నడిరోడ్డుపై అందరూ చూస్తుండగానే హతమర్చాడు. దాడి ఘటన జరుగుతున్న సమయంలో ఆ మార్గంలో వెళుతున్న ఓ వ్యక్తి నిందితుడిని నిలువరించేందుకు ప్రయత్నించినా అప్పటికే యువకుడు కుప్పకూలిపోయాడు. ఈ దాడికి సంబంధించి వీడియో గాంధీ పార్కుకు సమీపంలో ఉన్న సీసీ కెమెరాలో రికార్డయింది. కాగా హత్య జరిగిన వెంటనే నిందితుడు జోసఫ్‌ పోలీసులకు లొంగిపోయాడు.