విద్యుదాఘాతంతో కౌలు రైతు మృతి

జగిత్యాల గ్రామీణం, న్యూస్‌టుడే: పొలంలో తెగిపడిన విద్యుత్‌ తీగ తగిలి కౌలు రైతు అక్కడికక్కడే మృతిచెందిన ఘటన జగిత్యాల జిల్లాలో గురువారం ఉదయం చోటు చేసుకుంది. పోలీసుల కథనం ప్రకారం.. జగిత్యాల అర్బన్‌ మండలం తిప్పపన్నపేటకు చెందిన నలువాల నర్సయ్య (58) పొలాస గ్రామ శివారులో ఎకరం పది గుంటలు కౌలుకు తీసుకొని వరి సాగు చేపట్టారు. పంట పరిశీలనకు వెళ్లిన సమయంలో విద్యుత్‌ లైన్‌ నుంచి తెగిపడి ఉన్న వైరును గమనించకుండా దానిపై అడుగు వేశారు. దీంతో విద్యుదాఘాతానికి గురై పొలంలోనే దుర్మరణం పాలయ్యారు. నర్సయ్యకు భార్య, కుమారుడు, కుమార్తె ఉన్నారు. ఘటనపై కేసు నమోదు చేసుకొని దర్యాప్తు చేస్తున్నట్లు జగిత్యాల రూరల్‌ ఎస్సై సుధాకర్‌ తెలిపారు.