విద్యార్థినిపై దారుణం.. టీచర్‌కు పదేళ్లు జైలు శిక్ష, ₹10లక్షల జరిమానా

జైపుర్: విద్యార్థులకు విద్యాబుద్ధులు నేర్పి వారిని ఉన్నతంగా తీర్చిదిద్దాల్సిన గురువే ఓ విద్యార్థిని జీవితాన్ని సర్వనాశనం చేశాడు. ఆమె లైంగిక దాడికి పాల్పడి ఆ ఘోరాన్ని వీడియో చిత్రీకరించాడు. ఏడేళ్ల క్రితం జరిగిన ఈ కేసులో నిందితుడికి పదేళ్ల పాటు జైలు శిక్ష విధిస్తూ పోక్సో న్యాయస్థానం తీర్పు వెలువరించింది. వివరాల్లోకి వెళ్తే.. రాజస్థాన్‌లోని బుందీ జిల్లాలో ఓ ప్రభుత్వ పాఠశాలలో 9వ తరగతి చదివే విద్యార్థినిపై అదే స్కూల్‌లో ఉపాధ్యాయుడిగా పనిచేసే విశ్వేంద్ర మీనా(32) లైంగిక దాడికి పాల్పడ్డాడు. అంతేకాకుండా వీడియోను చిత్రీకరించి కిరాతకంగా వ్యవహరించాడు. ఈ విషయం బయటకు చెబితే వీడియోలను ఆన్‌లైన్‌లో పెడతానని, పరీక్షల్లో ఫెయిల్‌ చేస్తారంటూ బెదిరింపులకు పాల్పడ్డాడు. ఈ విషయం బాధితురాలి తండ్రికి తెలియడంతో 2016 నవంబర్‌ 10న పోలీసులను ఆశ్రయించారు. తన కుమార్తెపై జరిగిన దారుణంపై ఫిర్యాదు చేశాడు. దీంతో కేసు నమోదు చేసిన పోలీసులు నిందితుడిని అరెస్టు చేశారు. తాజాగా ఈ కేసును విచారించిన పోక్సో న్యాయస్థానం నిందితుడికి రూ.10లక్షల జరిమానా, 10 ఏళ్ల జైలు శిక్ష విధిస్తూ తీర్పు వెలువరించింది.