Eluru: ‘₹2 కోట్లు ఇవ్వకుంటే చంపేస్తాం..’ నక్సలైట్ల పేరుతో వ్యాపారికి బెదింపులు!

కైకలూరు: రూ.2 కోట్లు ఇవ్వాలని.. లేకుంటే చంపేస్తామని నక్సలైట్ల పేరుతో బెదిరింపులకు పాల్పడిన ముగ్గురిని పోలీసులు కటకటాల్లోకి నెట్టారు. ఏలూరు జిల్లాలోని కైకలూరులో ఈ ఘటన జరిగింది.

పోలీసులు తెలిపిన వివరాల ప్రకారం.. నక్సలైట్ల పేరుతో కైకలూరు వ్యాపారి ప్రసాద్‌రాజుకు నిందితులు నాలుగు రోజులుగా బెదిరింపు ఫోన్‌కాల్స్‌ చేశారు. రూ.2 కోట్లు ఇవ్వాలని.. లేదంటే చంపేస్తామన్నారు. ఈ బెదిరింపులపై మూడు రోజుల కిందట ప్రసాద్‌రాజు పోలీసులను ఆశ్రయించారు. ఈ క్రమంలో ప్రసాద్ రాజు ఇంటి వద్ద రెక్కీ నిర్వహిస్తున్న ముగ్గురు నిందితులు తోకల ఏసేబు, శీలం హేమంత్‌కుమార్‌, చిన్నం పెద్దబాబును.. కైకలూరు పోలీసులు అరెస్టు చేశారు. మరో నిందితుడు మాణిక్‌రావు పరారీలో ఉన్నాడు. మాణిక్‌రావు, ఏసేబు గతంలో ప్రసాద్‌రాజు వద్ద డ్రైవర్లుగా పని చేశారు. ఈ ఘటనపై కేసు నమోదు చేసిన పోలీసులు దర్యాప్తు చేపట్టారు.