వైకాపా పాలనలో ఆదివాసీలకు అన్యాయం

గూడెంకొత్తవీధిలో మాట్లాడుతున్న కూటమి అభ్యర్థి ఈశ్వరి

గూడెంకొత్తవీధి, న్యూస్‌టుడే: వైకాపా పాలనలో ఆదివాసీలకు అన్యాయం జరిగిందని పాడేరు అసెంబ్లీ నియోజకవర్గ కూటమి అభ్యర్థి గిడ్డి ఈశ్వరి ఆవేదన వ్యక్తంచేశారు. గూడెంకొత్తవీధిలో గురువారం తెదేపా, జనసేన, భాజపాల నాయకులు, కార్యకర్తలతో భారీ ర్యాలీ నిర్వహించారు. సమావేశంలో ఆమె మాట్లాడుతూ.. గిరిజన చట్టాలు, హక్కులను వైకాపా సర్కారు కాలరాసిందని విమర్శించారు. అక్రమ అరెస్ట్‌లు, భూ కబ్జాలతో ఇబ్బందులు పెట్టిందన్నారు. అభివృద్ధి జాడే కనిపించలేదని మండిపడ్డారు. గూడెంకొత్తవీధి జడ్పీటీసీ సభ్యురాలు శివరత్నం, ఎస్టీ కమిషన్‌ సభ్యుడైన ఆమె భర్త గిరిజనుల కోసం చేసిందేమీ లేదన్నారు. కూటమి అధికారంలోకి వస్తే అన్ని వర్గాలకు మేలు జరుగుతుందని చెప్పారు. తనను, ఎంపీ అభ్యర్థి కొత్తపల్లి గీతను గెలిపించాలని కోరారు. ఈ సందర్భంగా గూడెం కాలనీకి చెందిన మహిళలు, యువకులు, గుమ్మళ్లగొంది గ్రామానికి చెందిన మాజీ ప్రజాప్రతినిధులు ఈశ్వరి సమక్షంలో తెదేపాలో చేరారు. అనంతరం జీకే వీధి వారపు సంతలో ప్రచారం చేశారు. తెదేపా రాష్ట్ర కార్యదర్శి కిల్లు వెంకటరమేష్‌నాయుడు, నాయకులు పాండురంగస్వామి, చల్లంగి లక్ష్మణరావు, పాండురాజు, బాలరాజు, సిద్దు, బోండ్ల చిరంజీవి, కాకురి శేఖర్‌ తదితరులు పాల్గొన్నారు.