Anantapur: అనుమానంతో నిద్రిస్తున్న భార్యను అంతమొందించాడు

నారాయణమ్మ

అనంత నేరవార్తలు: భార్య మరో వ్యక్తితో వివాహేతర సంబంధం కొనసాగిస్తుందనే అనుమానంతో ఓ భర్త ఆమెను దారుణంగా హత్య చేసి హతమార్చాడు. ఈ ఘటన అనంత నగరంలో చోటు చేసుకుంది. ఉరవకొండకు చెందిన భార్యాభర్తలు  నారాయణమ్మ(38), నాగరాజులు కొన్నేళ్ల క్రితం జీవనోపాధి కోసం నగరానికి వచ్చారు. రుద్రంపేటలో నివాసముంటూ నాగరాజు ఆటో నడుపుతూ జీవనం సాగిస్తున్నారు. కొన్ని రోజులుగా భార్యపై అనుమానంపై తరచూ ఆమెతో గొడవపడేవాడు. గురువారం రాత్రి మరోసారి ఘర్షణ పడ్డారు.  భార్యను అంతమొందించాలని పథకం వేసిన అతడు శుక్రవారం తెల్లవారుజామున నిద్రిస్తున్న భార్యపై రోకలితో విచక్షణా రహితంగా దాడి చేసి పరారయ్యాడు. తల ఛిద్రమై తీవ్ర రక్తస్రావంతో అక్కడికక్కడే మృతి చెందింది. ఉదయాన్నే గమనించిన స్థానికులు పోలీసులకు సమాచారం ఇచ్చారు. ఘటనాస్థలిని పరిశీలించి నిందితుడి కోసం గాలింపు చేపట్టారు. రుద్రంపేట బైపాస్‌లో అతడిని అదుపులోకి తీసుకుని కేసు నమోదు చేశామని నాలుగో పట్టణ సీఐ ప్రతాపరెడ్డి తెలిపారు.