కష్టం.. వడగళ్లతో నష్టం

పశువులకు మేతగా పూలతోటలు

ఇటీవల మండలంలో కురిసిన వడగళ్ల వర్షం రైతులకు తీరని నష్టాన్ని మిగిల్చింది. తిరుమలరాజుపురం, శ్రీకావేరిరాజుపురం సీయంకండ్రిగ గ్రామాల్లోని పూల రైతులపై వరుణుడు ప్రతాపం చూపాడు. దీంతో చామంతి, ముద్దబంతి పూల తోటలకు పూర్తిగా నష్టం వాటిల్లింది. తిరుమలరాజుపురం గ్రామానికి చెందిన రైతు వేలురెడ్డి తన పొలంలో ఒకటిన్నర ఎకరం పొలంలో రూ.60 వేలు ఖర్చు చేసి చామంతి పూల సాగు చేశారు. కిలో రూ.200 ధరలు పలికే సమయానికి వడగళ్ల వర్షం కురవడంతో పంట పూర్తిగా దెబ్బతింది. రూ.లక్షకుపైగా వచ్చే లాభాలు తుడిచిపెట్టుకుపోయాయి. కంటిమీద కునుకు లేకుండా కాపాడిన తోటను చేసేది ఏమీ లేక పశువులకు మేతగా వదిలేశానని వాపోయారు.

న్యూస్‌టుడే, పాలసముద్రం