స్నేహితుడ్ని కలిసేందుకు వచ్చి కాలు కోల్పోయి..

సాంబమూర్తినగర్‌ (కాకినాడ): కాకినాడ జిల్లా సామర్లకోట రైల్వేస్టేషన్‌లో ఆదివారం రాత్రి రైలు ఎక్కే ప్రయత్నంలో ప్రమాదవశాత్తు జారి పడిపోయిన ఘటనలో హైదరాబాద్‌ పంజాగుట్ట ప్రాంతానికి చెందిన గూడవరపు సువర్ణ (22) తీవ్రంగా గాయపడిన విషయం విదితమే.. ఈ ఘటనలో ఆ యువతి ఎడమ కాలు కోల్పోయింది. ఆమె తండ్రి దుర్గాప్రసాద్‌ తెలిపిన వివరాల ప్రకారం.. పెద్దాపురం మండలం రాజభూపాలపట్నానికి చెందిన దుర్గాప్రసాద్‌ కుటుంబం చాలాకాలంగా హైదరాబాద్‌లో నివాసం ఉంటోంది. అతనికి భార్య, ఇద్దరు కుమార్తెలు, కుమారుడు ఉన్నారు. పెద్ద కుమార్తె సువర్ణ ఆదివారం ఉదయం హైదరాబాద్‌ నుంచి గౌతమి ఎక్స్‌ప్రెస్‌లో సామర్లకోట వచ్చి స్వగ్రామంలోని బంధువులు, స్నేహితుడ్ని కలిసింది. తిరిగి హైదరాబాద్‌ వెళ్లేందుకు గౌతమి ఎక్స్‌ప్రెస్‌లో వెళ్లేక్రమంలో ప్రమాదానికి గురైంది. జీజీహెచ్‌ ఎమర్జన్సీ వార్డులో చికిత్స పొందుతున్న ఆమెను ఐసీయూలోకి తరలించారు. ఎడమ కాలిలో ఎముకలు నలిగిపోవడంతో సోమవారం సాయంత్రం వైద్యులు శస్త్రచికిత్స చేసి కాలు తొలగించారన్నారు. ప్రాణాపాయం లేదని వైద్యులు చెప్పారని యువతి తండ్రి తెలిపారు.