ఎంపీ మాధవ్‌ వ్యవహారంలో సీఎం ఎందుకు స్పందించరు?

మాజీ మంత్రి ఆనందబాబు

పట్టాభిపురం, న్యూస్‌టుడే: ఎంపీ గోరంట్ల మాధవ్‌ వ్యవహారంలో సీఎం జగన్‌ ఎందుకు స్పందించడం లేదని మాజీ మంత్రి నక్కా ఆనందబాబు ప్రశ్నించారు. గుంటూరులో శుక్రవారం ఆయన విలేకర్లతో మాట్లాడారు. ‘ఎంపీ మాధవ్‌ దారిన పోయే దానయ్య కాదు ఇష్టం వచ్చిన విధంగా వ్యవహరించడానికి. బాధ్యతాయుతమైన పదవిలో ఉన్న ఎంపీ ఆయన. మాధవ్‌ చేసిన నీచమైన పనిపై జాతీయ మహిళా కమిషన్‌, పొరుగు రాష్ట్రాల ఎంపీలు స్పందించి తప్పు పడుతూ లేఖలు రాస్తున్నారు. ప్రభుత్వ సలహాదారు సజ్జల రామకృష్ణారెడ్డి మొదట ఓ మాట, తర్వాత మరో మాట మాట్లాడుతున్నారు. ఈ వ్యవహారంలో కులాల మధ్య ఘర్షణలు తీసుకువస్తున్నారు. మాధవ్‌ నిస్సిగ్గుగా మాట్లాడుతున్నారు. ఇప్పటికైనా జగన్‌ స్పందించి చర్యలు తీసుకోవాలి’.. అని డిమాండ్‌ చేశారు.