ఓటర్ల జాబితా సవరణకు శ్రీకారం

సత్తెనపల్లి, న్యూస్‌టుడే: షెడ్యూలు ప్రకారం వచ్చే ఏడాది జరగనున్న సార్వత్రిక ఎన్నికల నేపథ్యంలో ప్రత్యేక ఓటర్ల జాబితా సవరణ ప్రక్రియకు కేంద్ర ఎన్నికల సంఘం శ్రీకారం చుట్టింది. ఇప్పటికే సవరణ ప్రక్రియ మొదలైంది. వచ్చే జనవరి 1 నాటికి 18 ఏళ్లు నిండిన అందరికీ ఓటుహక్కు కల్పించే చర్యల్ని తీసుకోవాలని ఎన్నికల అధికారులకు కేంద్ర ఎన్నికల సంఘం మార్గదర్శకాలు చేసింది. జనవరి 25న జాతీయ ఓటర్ల దినోత్సవం సందర్భంగా కొత్తగా నమోదైన 18-19 ఏళ్ల ఓటర్లకు డిజిటల్‌ గుర్తింపు కార్డుల్ని పంపిణీ చేయనుంది. ఎన్నికల నేపథ్యంలో అన్ని రాజకీయ పార్టీలు ఓటర్ల జాబితా సవరణ ప్రక్రియపై ఇప్పటికే గురిపెట్టాయి.

షెడ్యూలు ఇలా...

* ఈనెల 20 వరకు మారిన విధానాలపై ఈఆర్‌వో, ఏఈఆర్‌వో, బీఎల్‌వోలకు శిక్షణలు
* ఆగస్టు 22 నుంచి సెప్టెంబరు 29 వరకు పోలింగ్‌ కేంద్రాల క్రమబద్ధీకరణ, మౌలిక వసతుల కల్పనపై దృష్టి.
* సెప్టెంబరు 30 నుంచి అక్టోబరు 10 వరకు ఫార్మేట్‌ 1 నుంచి 8, డ్రాఫ్ట్‌రోల్‌ సిద్ధం చేస్తారు.
* అక్టోబరు 17న డ్రాఫ్ట్‌ ఎలక్ట్రోరల్‌ ప్రచురణ
* అక్టోబరు 17 నుంచి నవంబరు 30 వరకు ఓటర్ల చేర్పులు, అభ్యంతరాల దరఖాస్తుల స్వీకరణ
* డిసెంబరు 26లోపు చేర్పులు, తొలగింపులు, ఇతర క్లెయిమ్‌ల పరిష్కారం
* 2024, జనవరి 1న ఓటర్ల జాబితాల తుది పరిశీలన.
* 2024 జనవరి 5న తుది ఓటర్ల జాబితాల ప్రచురణ.