కరీంనగర్‌: ముస్లింలను ఉద్దేశించి మాజీ ప్రధాని మన్మోహన్‌సింగ్‌ చేసిన వ్యాఖ్యలను భాజపా వక్రీకరించిందని తెలంగాణ మంత్రి పొన్నం ప్రభాకర్‌ (Ponnam Prabhakar) అన్నారు. ప్రధానిగా అన్ని వర్గాలకు ప్రాతినిధ్యం వహించాల్సిన మోదీ నీచంగా మాట్లాడుతున్నారని విమర్శించారు. కరీంనగర్‌ డీసీసీ కార్యాలయంలో నిర్వహించిన మీడియా సమావేశంలో మంత్రి మాట్లాడారు. కరీంనగర్‌ ఎంపీ అభ్యర్థి వెలిచాల రాజేందర్‌ రావేనని.. ఈ విషయంలో ఎలాంటి కన్ఫ్యూజన్‌ అవసరం లేదన్నారు. మంచిరోజు అయినందున సోమవారం నామినేషన్‌ వేయించామని తెలిపారు. ఆయన అభ్యర్థిత్వంపై అతి త్వరలో ప్రకటన వస్తుందని చెప్పారు.

‘‘తొలి దశ ఎన్నికల పోలింగ్‌ తర్వాత మోదీ వెన్నులో వణుకు పుడుతోంది. కేంద్రంలో కాంగ్రెస్‌ అధికారంలోకి వస్తే ముస్లింలకు ఆస్తులు పంచుతుందని ఆయన చెప్పడం విచారకరం. ఈ వ్యాఖ్యలను సుప్రీంకోర్టు సుమోటోగా తీసుకోవాలి. మా పార్టీ హామీలైన పాంచ్‌ న్యాయ్‌, కులగణన వంటివి భాజపాకు రుచించడం లేదు. మేం అన్నివర్గాలకు న్యాయం చేసేవిధంగా పాలించాం. నియంతృత్వానికి వ్యతిరేకంగా ఈ ఎన్నికల్లో ప్రజలు తీర్పు ఇవ్వబోతున్నారు. ఉపాధి హామీ నిధులు కూడా తానే తెచ్చినట్లు బండి సంజయ్‌ ప్రచారం చేసుకోవడం సిగ్గుచేటు. ఎంపీగా కరీంనగర్‌కు ఏం చేశారు? తల్లీబిడ్డల గురించి ఆయన అవమానకరంగా మాట్లాడారు. భాజపా రాష్ట్ర అధ్యక్ష పదవి నుంచి ఆయన్ను ఎందుకు తొలగించారో చెప్పాలి’’ అని పొన్నం ప్రభాకర్‌ ప్రశ్నించారు.