విమానంలో ‘ఉత్తుత్తి బాంబు’

బెంగళూరు (గ్రామీణం), న్యూస్‌టుడే : కోల్‌కతా నుంచి కెంపేగౌడ అంతర్జాతీయ విమానాశ్రయానికి ఆదివారం సాయంత్రం వచ్చిన ఇండిగో విమానంలో బాంబు బెదిరింపు సందేశం ఒకటి కనిపించింది. ప్రయాణికులు దిగి వెళ్లిన తర్వాత విమానంలోని 6-డి సీటులో పడి ఉన్న టిష్యూ కాగితంపై విమానంలో బాంబు ఉందని నీలం అక్షరాలతో రాసి ఉన్న కాగితాన్ని విమాన సిబ్బంది గుర్తించారు. తక్షణమే బాంబు నిష్క్రియ దళానికి సమాచారం అందించారు. రన్‌వే నుంచి పక్కకు తీసుకు వెళ్లి విమానాన్ని క్షుణ్ణంగా జల్లెడ పట్టి, అది ఉత్తుత్తి బెదిరింపుగా గుర్తించారు. విమానయాన సంస్థ ప్రతినిధుల ఫిర్యాదు మేరకు దర్యాప్తు చేపట్టామని విమానాశ్రయం పోలీసులు సోమవారం ప్రకటించారు.