మహాదుర్గగా భ్రామరి

నేడు మల్లన్నకు ప్రభోత్సవం

కైలాస వాహనంపై కొలువైన స్వామి, అమ్మవార్లు

శ్రీశైలం ఆలయం, న్యూస్‌టుడే : ద్వాదశ జ్యోతిర్లింగ క్షేత్రమైన శ్రీశైలంలో ఉగాది మహోత్సవాలు శోభాయమానంగా జరుగుతున్నాయి. ఉత్సవాల్లో రెండోరోజు సోమవారం రాత్రి 7 గంటలకు భ్రమరాంబాదేవి భక్తులకు మహాదుర్గ అలంకారంలో దర్శనమిచ్చారు. స్వామి, అమ్మవార్లు కైలాస వాహనంపై ఆశీనులై పూజలందుకున్నారు. అనంతరం స్వామి, అమ్మవార్ల ఉత్సవమూర్తులను మంగళవాయిద్యాల నడుమ గ్రామోత్సవానికి తీసుకొచ్చారు. గంగాధర మండపం నుంచి నందిమండపం, బయలు వీరభద్రస్వామి ఆలయం వరకు ఊరేగించారు. దేవస్థానం ఈవో ఎస్‌.లవన్న, అర్చకులు నారికేళాలు, కర్పూర హారతులు సమర్పించారు. ఉత్సవం ఎదుట కళాకారులు ప్రదర్శించిన వేషధారణలు, నృత్యాలు, ఢమరుక నాదాలు, కోలాటం ఇతర సాంస్కృతిక కార్యక్రమాలు భక్తులను ఆకట్టుకున్నాయి.