పాటలు వింటూ.. హీటర్‌ పట్టుకుని..

క్షేత్రన్ననాయుడు

విఠలాపురం(మల్దకల్‌) : ఇయర్‌ ఫోన్స్‌లో పాటలు వింటూ.. స్నానం చేయడానికి హీటర్‌ పెట్టుకోబోయి ప్రమాదవశాత్తు విద్యుదాఘాతానికి గురై ఓ యువకుడు మృతి చెందాడు. గ్రామస్థుల వివరాల ప్రకారం.. మల్దకల్‌ మండలం విఠలాపురం గ్రామానికి చెందిన లక్ష్మన్న, శారదమ్మల కుమారుడు క్షేత్రన్న నాయుడు(20) గద్వాలలో కూలీ పనులు చేస్తూ జీవనం సాగిస్తున్నాడు. గురువారం బంధువుల నూతన గృహ ప్రవేశ వేడుకలు ఉంటే స్వగ్రామానికి వచ్చాడు. గురువారం రాత్రి స్నానం చేయడానికి ఇయర్‌ఫోన్స్‌ చెవిలో పెట్టుకుని హీటర్‌ను ముందుగా బోర్డు స్విచ్‌ ఫ్లగ్‌లో ఉంచాడు. పాటలు వింటూ అనుకోకుండా హీటర్‌ను చేతితో పట్టుకుని నీటి బకెట్‌లో ఉంచడానికి ప్రయత్నించేలోపే విద్యుదాఘాతానికి గురై మృతి చెందాడు. యువకుడి మరణంతో కుటుంబంలో విషాదం నెలకొంది.