బారులు తీరిన వాహనాలు

పంతంగి టోల్‌ప్లాజా వద్ద వాహనాలు

చౌటుప్పల్‌ గ్రామీణం, న్యూస్‌టుడే: హైదరాబాద్‌-విజయవాడ జాతీయ రహదారిపై భోగి పండుగ రోజు వాహనాలు బారులు తీరాయి. సంక్రాంతి పండుగకు ఊరెళ్లే ప్రయాణికులతో యాదాద్రి భువనగిరి జిల్లా చౌటుప్పల్‌ పట్టణంలోని పలు కూడళ్ల వద్ద శుక్రవారం వాహనాల రద్దీ నెలకొంది. పంతంగి టోల్‌ప్లాజా వద్ద ఫాస్టాగ్‌ విధానం పూర్తి స్థాయిలో అమలు ఉండటంతో వాహనాల రాకపోకలు సాఫీగా జరిగాయి. టోల్‌ప్లాజా మీదుగా గురువారం ఒక్క రోజే 45,725 వాహనాలు రాకపోకలు సాగించాయి. వీటిలో 34,026 కార్లు ఉండటం గమనార్హం. వాహనాల రాకపోకలకు అంతరాయం కలగకుండా తగిన ఏర్పాట్లు చేశామని పోలీసులు, జీఎమ్మార్‌ సంస్థ అధికారులు తెలిపారు.